Jamira, Hailakandi district, Assam-ah hun rei tak rêl kawng a chhiat avanga relin Mizoramah buhfai a phurh luh theih loh hnuah nimin khan rél wagon 29-in Bairabi-ah buhfai quintal 18,560 a phur thleng.
Food, Civil Supplies and Consumer Affairs (FCSCA) department hotute chuan, Mizoramin buhfai a lak luhna pui ber rêl kawng, tuilian leh leimin vanga August 2024 thla laihâwl aṭanga a chhiat avangin rêl hmanga buhfai lak luh a khaihlak tih an sawi a, "Hei vang hian Mizorama buhfai PDS supply pawh uluk taka stock kan neih sa leh FCI kudama stock awm sa aṭangin sem rual a ni," an ti.
FCSCA department hotute chuan, rêl kawng a chhiat hmaa Bairabi rêl chawlhhmuna rélin buhfai a phurh thlen hnuhnung ber chu rél kawng chhiat hma chiah ní, August 14 kha a nih thu an sawi a, "Thla hnih leh a chanve dawn lai rêl kawng chhia vangin buhfai lo lut tur a khaihlak phah a ni," an ti a; buhfaiah harsatna a awm loh nan sorkar hotute'n hma an lak nghal thu an tarlang.
Supply department hotute tarlan danin, rêl kawng chhiat thu hriat a nih veleh chief minister Lalduhoma'n hma la nghalin, sorkar laipuia Railways hotu liante a be nghal a; rêl kawng chhia chu chak taka siam ṭha turin a ngen.
FCSCA minister B Lalchhanzova pawhin a theih ang angin hma a la a, September 27 khan rel kawng chhiatna hmun (Jamira) a tlawh bakah, Railways hotute a bia a, a rang thei ang bera rél kawng siam ṭhat a nih theih nan ṭan la turin a ngen a, buhfai chu Mizoram mipui chaw pui ber a nih avangin rêl kawng siam ṭhat a nih hmaa buhfai lak luh dan turte a sawipui a ni.
B Lalchhanzova hian Maligaon, Guwahati-ah Railways hotu lian a hmu bawk a, rel kawng siamṭhat hna thawha thlen chinte a sawipui bakah, Mizoramin buhfai chat lak loa a hmuh theih dan turte a sawipui bawk a; Railways hotute chuan October 2024 tàwpah rêl kawng chhia siam zawh ngei an tum thu an lo hrilh.
FCSCA department hotute chuan, Railways lamin Jamira-a rêl kawng chhia an siam zo a, thla hnih leh a chanve hnuah nimin October 31 khan rél wagon 29-in Bairabi-ah buhfai quintal 18,560 a phur thleng tih an sawi a, "Mipuite'n ei leh bar kan nghei loh nana chak taka hma latu Chief Minister leh Supply Minister kan nei hi a thlamuan thlak kan tiin, lawmawm kan ti tak zet a ni," an ti.
