Congress Treasurer-in ngaihdam a dil

Mizoram Pradesh Congress Committee treasurer Dr Lalmalsawma Nghaka chu nimin khan Sinlung Hills Council huam chhungah SHC inthlanpui awm tur atan campaign in, Sakawrdai, Zohmun, Ṭinghmun leh Vaitin-te a tlawh a; Congress party-in an tih fuh loh leh mipui beisei an phak lohnaah ngaihdam a dil.

MPCC Treasurer chuan, Congress party-in ram tan thil ṭha tam tak an lo tih tawh thu a sawi a, "Chutih rual chuan, tih fuh tâwk loh leh mipui beisei phâk lohna kan nei tih kan hria; khang avangte khan vawiinah tih tak zetin kan ram mipui hnenah ngaihdam kan dil nawn a ni," a ti.

Dr Lalmalsawma chuan, "Kan ram mipui tana chhenfâkawm leh intiamnaa ding nghet sorkar a din leh theih nan Congress party hian Pathian kaihhuaina dil chungin insiam thar lehin, kan tho kâng leh mek... Mizoram mipui tan dik tak leh rinawm taka rawngbawl turin Congress party a inbuatsaih leh mek a ni," a ti a; Mizoramah mahni intiamnaa ding lo sorkar a ding mek niin a sawi.

MPCC Treasurer chuan, ZPM kaihhruai sorkar chu kum khat dáwn a kal tawh chungin healthcare policy an duang hlei thei lo a, March 2025 thlenga hman theih tur chhungkaw khat tan Rs 1,00,000 an rawn ti thei ta chauh tih a sawi a, "Mipuite'n beiseina kan neih san tehlul lul nen, kan beiseina chanve chanve leh pawh an rawn tihlawhtling thei lo a, beidawnna leh mittui tlakna a thleng mek a ni," a ti.

Dr Lalmalsawma chuan, ZPM sorkar chu ration buhfai, hmunphiah lei, sum inrenchem leh intiamnaa din kawngah an hlawhchham nia sawiin, "MNF sorkar, Mizoram mipui tan ṭahna leh ha ṭhialna thlentute nen an danglamna a tam lo ta viau," a ti a; mi harsa zawkte leh mi nawlpui tan retheihna a zual zel laiin, ZPM party induhsakna leh mi tlemtête tana hausakna a theng mek niin a sawi bawk.