Bana Kaih hnuaia thlai hralh dan tur rêl
October 30, Nilaini khan Champhai, Serchhip leh Lawngtlaiahte District Agriculture Marketing Committee (DAMC)-in Bana Kaih (Handholding) Scheme hnuaia thlai hralh dan tur an rêl.
Champhai DAMC chu an chairman VL Remliana, bawrhsap hoin an ṭhukhawm a; khua/veng tina Bána Kaih hnuaia thlai buaipuitu tur society thlang tur leh a ṭul anga an hming siamremsak turin District Horticulture Officer leh Champhai DAMC co-opted member-te an ruat.
Bána Kaih scheme chungchang inzirtirna neih neih dan tur leh a hun tur sawihoin, secondary collection centre turte an thlang a; Champhai district chu area pariatah ṭhen niin, department chan tur bial chin ruahman a ni. Aizawla Buyers-Seller Meet neih tura tel dan turte an sawiho bawk.
Serchhip DAMC pawh an chairman Paul L Khuma, bawrhsap hoin DC meeting hall-ah an ṭhu a; kut hnathawktute chu society-ah ziah luh an nih dawn thu leh sorkarin inkaihhruaina a siam angin khaw tinah society pakhat ṭheuh din a nih dawn thu tarlan a ni.
Serchhip district-a khua zawng zawng, khaw 39-a society din tur rawtna lutte an pawm a, khaw 39-ah hian primary collection centre din a ni dawn. Khaw 39-te chu cluster pali - Khawlailung cluster, Thenzawl cluster, Serchhip cluster leh Chhingchhip cluster-ahte ṭhen a ni a, cluster tinah secondary collection centre pakhat ṭheuh siam a ni ang.
Lawngtlai DAMC chu bawrhsap Cheemala Siva Gopal Reddy, DAMC chairman kaihhruaiin DC conference hall-ah an ṭhukhawm a; Mizoram Agricultural Marketing Board-in Lawngtlai district tana loneitu pawl, Farmer's Cooperative Society 56 a pawm chu an zir chiang a, a hma thei ang bera pawmpui ni se, an ti.
Thlai thar lak khawmna hmun - primary leh secondary collection centre din chungchangah, data lak khawm mek a nih avangin data lak khawm zawhah thlan ni se an ti. Thlai lak khawm, lei leh hralh chungchang inzirtirna khaw tinah neih an rêl a, chuta tan chuan a kaihhnawih sorkar department-te leh BDO-te'n khaw tina village council-te thawhpuiin, a ṭul angin vantlang inkhawm (gram sabha) ko se, an ti bawk.