KHAWTHLIR

KṬP-in thisen pe

KṬP, Chaltlang South Branch chuan nimin khan an kohhran hall-ah Synod Hospital tan thisen unit 33 an pe a, petute mipa 31 leh hmeichhia pahnih an ni.

Lungphùm phúm

Synod moderator Rev. R Vanlalnghaka chuan October 29, 2024 khan Synod Hospital Centenary Building sak tur lungphùm a phúm. Synod Hospital hi kum 2028-ah kum 100 a tling dawn a, chumi pual chuan Synod Hospital Centenary Building sak tum niin, vawiin November 1 hian sak hna ṭan tum a ni. In hi chhâwng thuma sak tur a ni a, a satu tur chu LT Construction, Ramhlun Venglai niin, thla 30 chhunga sak zawh tura ruahman a ni.

CMRF-ah chhûng

Mizoram PWD Class-I Contractor Association chuan nimin khan Chief Minister's Relief Fund (CMRF)-ah Rs 15,00,000 an chhûng lut a, chief minister Lalduhoma hnenah an hlan. Chief Minister chuan, Pathian zarah CMRF a lut ṭha thawkhat tih sawiin, "Ṭanpui ngaite hnenah kan sem chhuak nasa; ni tina pe chhuak ang kan ni a, a ṭangkai em em a ni," a ti.

Jan Suraksha

Kolasib District Consultative Committee Meeting on Campaign for Jan Suraksha Schemes at Gram Panchayat Level chu an chairman B Malsawmtluangi, additional DC kaihhruaiin October 30, Nilaini khan an ṭhu. Kolasib district-ah hian Jan Suraksha Campaign nei turin bank 20 leh VC 56 an awm a, VC-te tuam turin an bul hnai bank-te ṭheuh ruat a ni.

Official-te ṭhukhawm

Khawzawl District Sanitation Task Force leh Sigle Use Plastic Inspection Team chu additional DC Lalfakzuala hoin October 30, Nilaini khan an ṭhukhawm a, hmalak dan tur an rêl. District Sanitation Task Force member-te bakah, Single Used Plastic Inspection Team member te, Block Mission Manager, MzSRLM, Khawzawl RD Block leh City Mission Manager, DAY,NULM, Khawzawl aiawhte an tel a ni.