YMA hi Mizo hnam ro hlu a ni - Minister Lalnilawma

Minister of state Prof. Lalnilawma chuan, YMA chu Mizo hnam ro hlu a nih thu sawiin, YMA awm lo se chuan Mizoram dinhmun tur ngaihtuah ngam a nih loh thu a sawi.

Prof. Lalnilawma hian nimin khan a biala Seling Branch YMA golden jubilee lawmna a hmanpuinaah thu sawiin, "YMA hi kan khawtlang leh Zo fate ro hlu a ni. YMA hi awm lo ta se, tute nge thlân lai ta ang, tute nge khawhar inah kal ang a, tute nge tlawmngaia ruihhlo do ta ang le? YMA hi awm lo ta se, kan ram dinhmun tur hi ngaihtuah ngam a ni lo. Zo fate tan Pathianin YMA min pe hi malsawmna hlu tak a ni," a ti.

YMA-in a thil tum pathum hmangin khawtlang leh ram tan nasa takin hna a thawk tih sawiin Lalnilawma chuan, "Kumpuante neiin, zirna kawnga ṭhalaite'n hma an sawn theih nan hma an la a, kohhrante nen lungrual takin mihring nun siamṭhat kawngah thâ an thawh mek," a ti a; ram leh hnam humhalhnaah YMA-in an thawh hlâwk thu a sawi.

Ṭawi bialtu MLA chuan, YMA chu sorkar tan pawh innghahna leh thlamuantu a nih thu sawiin, "Tuihna humhalh kawngahte PHE department puitu niin nasa takin ke an pên. Ruihlo do kawngah leh hnam ziarâng chawi nun bakah, kawng hrang hranga sorkar leh YMA-te'n thawh dunna ṭha tak kan nei hi thil lawmawm tak a ni," a ti.

Hun âwl hman ṭhat chungchangah Mizoram mipuiin hmasawnna tur an ngah thu sawiin Prof. Lalnilawma chuan, "Kan ṭhalaite hi hun âwl hman ṭhat kawngah harh thar se ka duh hle. Sorkarin ram leh hnam hmasawnna turin ke a pên mek a, zirna, hriselna, eizawnna leh hmasawnna hna thawhnaa sorkarin hma a laknate hi YMA-in min hriatpui a, sorkar thâ tichaktu ni zel turin ka beisei che u a ni," a ti a; sorkar hmalakna hrang hrangah thlawptu leh tichaktu ni zel turin YMA a sáwm.

YMA, Seling Branch hi kum 1974 khan din a ni a, member 1,047 an awm mek. An branch aṭang hian branch dang eng emaw zat an indang tawh a ni.