MNF Sub-Hqrs, Lunglei an inthlang; Zorama leh a thawhpuite an ring tawk

MNF Sub-Headquarters, Lunglei chu October 30, Nilaini khan Saikuti Hall-ah an inthlang a, president atan Vanlalhmuaka, Electric Veng, Lunglei an thlang. resolution siamin, MNF president Zoramthanga leh hruaitute an rin tâwk thu an tarlang.

Lunglei MNF Sub-Hqrs inthlanna inkhawm hi MNF Gen.Hqrs adviser ZH Ropuia'n a kaihruai a, MNF Gen.Hqrs treasurer Lalruatkima'n a hmanpui. Office bearer atana an thlante chu - president atan Vanlalhmuaka, vice president atan Chawngthanmawia Chawngthu, Ramthar Veng leh treasurer atan H Lalremruata, Farm Veng te an ni.

Lalruatkima chuan, inthlanna inkhawmah Saikuti Hall-a leng ṭha mang lo an kal khawm thei chu lawmawm a tih thu sawiin, "MNF-te'n chona thar hmachhawn a ṭulzia a lang. MNF hi kum 1961-a din a ni a, Pathianin kum 64 lai hun nuam leh harsa karah min hruai a, hruaitu ṭha tak tak Pathianin min pe zel. Kan tih fuh lohte inngaidam tawnin, insiamṭhaa hma lam pan zel a ṭul," a ti.

Ram leh hnam leh sakhaw himna thlirin MNF sorkar hun lai a ngaihawm hle nia sawiin Lalruatkima chuan, "Kan hun laiin ṭhenawm state-te an ralmuang a, ni tina mipui mamawh kan hnianghnâr hle," a ti a; tuna ZPM kaihhruai sorkarin sum tlaran zawnga an kalpui mek a, an hruaitute an invulh nasa hle tawh niin a sawi.

MNF Sub-Hqrs Lunglei Resolution

1. MNF president Zoramthanga leh a thawhpui kan hruaitute hi MNF party min kaihhruai zel tur hian kan ring tawk a ni.

2. MNF Sub-Hqrs, Lunglei hruaitu thlan thar turte hi lungrual takin kan hruaituah kan pawm a, an kaihhruaina hnuaiah hian MNF Sub-Hqrs, Lunglei hi chak taka kal zel kan tum.

3. MNF hi 'Pathian leh kan ram tan' tia Mizo hnampa Laldenga leh a thawhpuite'n Pathian hriatpuia an din a ni tih hi kan pawm a, Mizoram enkawl leh siamṭhaa hmasawnna kawng zawhtir tur leh din a nih chhante tipuitling ngei tura theihtawp chhuah zel kan tum.