Aizawl Hmathlir Pawl-in lawmthu sawi

Aizawl Hmathlir Pawl chuan thuchhuah siamin, Zodin Square, Aizawla Mahatma Gandhi lim awmna ṭhina UDPA department-in cafetaria (coffee shop) siamna tur in sak tawh, an ngenna anga ṭhiah a ni leh ta chu lawmawm an tih thu an tarlang.

An pawl chu Aizawl khawpui chenna nuam leh hahdam zawk a nih theihna tura a ṭul anga sorkar hnena thurâwn petu tura din an nih thu tarlangin Aizawl Hmathlir Pawl chuan, "UDPA minister Pu K Sapdanga hnena kan ngen angin, Mahatma Gandhi lim awmna ṭhina cafetaria siamna tura UDPA-in ruahmanna a siam tawh leh building an sak tawh chu ṭhiah leh a ni ta hi kan lawm a. Kal velte chawlh hahdamna tura ṭhutnate dah a, plant leh pangpar mawi tak takte dahna tura ruahmanna an siam hi lawmawm kan ti tak zet," an ti.

Aizawl Hmathlir Pawl chuan, khawpui laili aṭanga Assam Rifles an chhuah hunah an kalsan tur ramah thing leh pangparte phun a, Aizawl mipui thâwk lâkna leh lên khawthawnna nuam tak siam a nih theihna tura hma la turin sorkar an ngen nghal tih an tarlang bawk.