2024-ah ASF vangin vawk 38,122 thi tawh; ASF vanga vawk thi-ah zawngnadawmna dil mek

Kumin 2024-a thla 10 chhung, October 31 thlengin vawk pùl hri, African Swine Fever (ASF) vangin vawk 14,348 a thi tawh a, vawk 23,774 suat a ni tawh. ASF vanga kumina vawk thi leh suat zawng zawng chu 38,122 a ni.

ASF vanga vawk thite Mizoram sorkarin State Specific Disaster-ah a puan avangin Disaster Management Act, 2005 hnuaiah State Disaster Response Fund (SDRF) aṭangin zangnadawmna pek theih a ni a; district tina Vety officer-te'n District Disaster Management Authority (DDMA), bawrhsap hnenah vawk thi neitute tan zangnadawmna dilna an thehlut mek.

Kuminah January 1 aṭanga October 31, nimin thleng khan Mizorama khua/veng 252-ah ASF vanga vawk thi leh suat 38,122 a awm tawh a, chu'ng zinga 14,348 chu hri vanga thi a ni. October 30, Nilaini bikah khan district pahniha khua/veng pathumah ASF vangin vawk pakua a thi a ni.

Sorkar thuchhuah tarlan danin, ASF vanga vawk thi neitute chhawmdawlna/zangnadawmna hi hri vanga vawk a thih ní aṭanga ni 30 chhung emaw, ASF vanga vawk thite state disaster atana puanna notification tihchhuah ni (October 14, 2024) aṭanga ni 30 chhungin dilna tihfel a ngai.

Zangnadawmna dilna chu DVO kaltlangin mahni district ṭheuha DC-ah a lut khawm ang a, DMR department-ah thawn a nih hmain uluk taka endik leh phawt a ni ang. Zangnadawmna dawng tura tihte chu an bank account-ah pawisa thun tur a ni.

ASF lêng avanga vawk hlohtute chhawmdawlna chu SDRF kalphung angin vawk pakhatah Rs 4,000 zel pek theih a ni a, kumin chhunga ASF vanga harsatna (State Specific Disaster of ASF for 2024) bik atan erawh chuan vawk thi chu eng zat pawh ni se, chhawmdawlna hi chhungkaw khat tan vawk paruk chin bak pek theih a ni dawn lo.

Vanglaini palai zawhna chhangin AH&Vety department hotute chuan, ASF vanga vawk thi neitute tan district tina district veterinary officer (DVO)-te'n DDMA/DC-ah zangnadawmna dilna an thehluhsak mek a; October 30, Nilaini thlenga vawk thite an nghah khawm avangin mi engzat nge an dilsak hriat theih a la ni lo.

Vawk thite chu ASF vanga thi ngei a ni tih fiahna DVO-te'n lehkha (certificate) an siam thu sawiin AH&Vety department hotute chuan, "DVO-in certificate a siam tel lo chuan dilna pawm theih a ni lo," an ti.