Bana Kaih scheme-ah taxi a tel lo

Mizoram State Policy Coordination Committee (MSPCC) chuan October 30, Nilaini khan adviser to CM (Handholding) Dr KC Lalmalsawmzauva kaihhruaiin Planning meeting room-ah Bána Kaih Scheme kel meka department ṭhenkhat hnuaia dilna lutte an sawiho. Taxi leh auto-rickshaw chu Bána Kaih (Handholding)-in a huam tel rih loh thu sawi a ni.

Ṭhutkhawmah hian lirthei lei dilna lut chungchang sawiho a ni a; taxi (two wheeler & four wheeler) leh auto-rickshaw atana dilna chu Handholding Scheme-in a huam tel loh thu sawi a ni. Mihring phur sumdawnna lirthei (commercial passenger vehicle) dangah chuan, a diltu hminga State Transport Authority (STA)-in permit/licence a pek tawhte chu scheme-in a huam thei tih an sawi.

CM Special Package dilna chu Chief Minister's Office-ah dilna thehluh tura ruahman ni mah se, ṭhutkhawmah hian mipui remchan zawkna atan an awmna DC-te hnenah pawh dilna thehluh theih tawh turin rel a ni a; Handholding Scheme inkaihhruaina bu Mizo ṭawnga lehlin chu thlirhoa pawm a ni bawk.

Ṭhutkhawmah hian MSPCC member-te leh Planning & Programme Implementation, Commerce & Industries, Transport, Tourism, Information & Public Relations leh Information & Communication Technology department hotute bakah, SBI, Apex Bank leh MCAB aiawhte an tel a ni.