Ruihhlo laka fihlim dan inzirtir

Kolasib District Task Force on Ruihhlo Do leh Diakkawn YMA chuan nimin khan Kolasib Diakkawn YMA Hall-ah zirlaite pualin ruih theih thil laka fihlim tura inzirtirna an buatsaih a; district bawrhsap Robert C Lalhmangaiha'n a hmanpui.

Robert C Lalhmangaiha chuan, Kolasib district chu Mizoram tan a pawimawh thu sawiin, "Assam nen inìina leh Mizoram châk lâkna ber a ni a, bungraw tam tak lut zingah thil ṭha lo, ruih theih thil pawh a lut tel ṭhin. Hemi dang tur hian Kolasib-a chengte leh YMA-te mawhphurhna a sang hle a ni," a ti.

Sualna hrang hrang - ruih theih thil leh hursualna laka fihlim tura zirlaite chahin Bawrhsap chuan, "Hei hi Pathian thuin min zirtir dan pawh a ni. Mizoram hma hun chu nangmahni kutah a awm a, ram hmangaihna thinlung in put a ngai a ni," a ti a; Mizo culture ngai pawimawha chhawm nung zel turin a chah bawk.

Inzirtirna hun hi Education Sub-Committee chairman Lalrinmawia Ngente-in a kaihruai a; master trainer Lalremsiama Varte leh DCPO David Zaitinvawra ten ruihhoin hriselna a khawih pawi theih dan leh rilru thlenga a nghawng dante an sawifiah a ni.