Dik thei ang berin sum hman a ni dawn - Lalnghinglova

Minister of state Lalnghinglova Hmar chuan, Sinlung Hills Council (SHC)-a sum awmte chu beitham deuhin lang mah se, dik taka hman chuan hmasawnna thlen thei a nih thu sawiin, SHC inthlanah ZPM leh HPC-in sorkarna an chan chuan a dik thei ang bera sum hman a nih dawn thu a sawi.

Lalnghinglova Hmar hian October 30-31, 2024 khan SHC chhung - Zohmun, Ṭinghmun leh New Vervek biala khaw hrang hrang a tlawhnaah thu sawiin, "Hmun ṭhenkhatah SHC sum hman danah mipui an lungawi kim loh thu te, langtlang taka thil kalpui loha hna thawhna sum awm zat mipuiin an hriat loh thute min hrilh. ZPM kan sorkar a nih chuan langtlang takin sum enkawl a ni ang," a ti.

Lalnghinglova Hmar chuan, hna thawktu chuan thawh hlawh a nei ngei tur a ni tih sawiin, "Nimahsela, uchuak taka hlêp tumna leh sum thuhrûk awm ṭhin hian hmasawnna a tiṭhuanawp a, mipui pawhin kan vênpui tur a ni," a ti a; SHC huam chhunga mite'n hmasawnna thlen phak lohna ram anga an inngai reng chu a fel loh thu a sawi.

SHC sum hmuh zat leh an dinhmun enin tun aia ṭhaa kalpui theih a ni ngei a rin thu sawiin Lalnghinglova chuan, "Hei hi ZPM-in kan tum pawh a ni. Tihhlawhtlin theih loh tur thil lian pui pui tiam ka tum lo a, nimahsela, kan theihna chinah tun ang ringawt lo deuh hian kan kalpui ngei ang," a ti.

Sports Minister chuan, politics chu ram siamna hmanrua a nih thu sawiin, "Lal inchuhna ringawt anga kan ngaih chuan a tum a ṭhelh a ni. Kan theihna a sang lo a nih pawhin kan phak tawkah ram siam tumna kan neih phawt chuan SHC aṭang pawhin ram hi siam theih a ni," a ti a; mipui náwlpuiin ram veina tak tak an neih chuan ram hruaitute kal sual tur veng theitu an ni thei tih a sawi bawk.