Governor Indra Sena Reddy Nallu chuan, Mizorama project ṭan tawh leh kalpui mek, engemaw rokhawlhna avanga tawp lailawkte chu chinfela, zawhfel thuai a ṭul thu a sawi.
Sairanga FCI kudam sak hna chawlh lailawk mek chungchangah nimin khan Governor chuan a kaihhnawih sorkar department - Land Revenue & Settlement, Environment, Forests & Climate Change (EFCC) leh Food Corporation of India (FCI) hotute chu harsatna awmte chinfel theih dan tur a sawipui a ni.
Governor chuan hmasawnna ruhrel pawimawh siam a nih hmain nakin lawka harsatna a awm loh nana fimkhur tlan a ṭul thu a sawi a, "Hemi kawngah hian a kaihhnawih department hrang hrangte inkarah thawhhona ṭha a awm a pawimawh. Project ṭan tawh leh kalpui mek, eng emaw rokhawlhna avanga tawp lailawkte chu chinfela, zawhfel thuai a ṭul a ni," a ti.
FCI kudam chu Mizoram mipui tana pawimawh a nih avangin sorkar laipuiin a phût angte a ranglama bawhzuia chinfel thuai tum tur leh FCI kudam sak hna tawpsan lailawk chu ṭan leh thuai a nih theih nana ṭan la turin official-te a chah.
Ṭhukhawm hian Sairanga FCI kudam sak hna kalpui tawh dan leh thlen chin te, EFCC department aṭanga Riverine Reserved Forest (RRF) tia tawpsan rih tura hriattirna (stay order) pek chungchang leh ministry phut anga hmalak ngaite an sawiho. Hemi atana Compensatory Afforestation (CF) tur ram dawnfel a nih tawh thu tarlan a ni.
FCI kudam sak mek chu project pawimawh tak leh Mizoram tana ṭangkai tur a nih avangin tikhawtlai zel loa puitlin thuai a nih theih nana hmalak ho dan turte sawiho a ni.
He hunah hian LRS secretary Vanlalmawia, principal chief conservative of forest Ashok Kumar Biswal, CCF NC Saravanan, LRS director V Lalduhzuala, CF MZ Singzon, FCI divisional manager Zodinpuii Ralte leh official dangte an tel.
Sairang FCI Kudam
* Kudam hi kum 2021 vel khan FCSCA department ram hectare 3.1 vela zau hawhtira sak a ni.
* Buhfai metric ton 10,000 leng thei tura ruahman a ni.
* Building pathum sak tur zingah buhfai metric ton 5,000 leh metric ton 2,500 leng building sak hna zawhfel thawkhat a ni tawh.
* Metric ton 2,500 leng building pakhat leh a kentel pawimawh dangte sak hmabak a la awm.
