Aizawl bawlhhlawh sawngbawlna tlawh tam turin thawktute chah

Governor Indra Sena Reddy Nallu chuan October 7, Thawhṭanni khan Raj Bhavan-ah Solid Waste Management Centre, Tuirial enkawltu sorkar department hrang hrang hotute a kawm. Governor chuan, khawpui fai taka Aizawl siam turin bawlhhlawh sawngbawlna hmun dinhmun hriat chian a pawimawh thu sawiin, thawktute chu tlawh tam turin a chah.

Indra Sena Reddy Nallu chuan, hmasawnna kawng zawh tur chuan mahni dinhmun hriat chian hmasak a pawimawh thu a sawi a, "Aizawl hi khawpui fai taka siam tur chuan bawlhhlawh kan sawngbawlna hmun dinhmun hriat chian a pawimawh. Chumi tur chuan thawktute'n an tlawh tam a ṭul a, kan dinhmun ang ang kan pawm hmasak a pawimawh," a ti.

Solid Waste Management Centre, Tuirial chu mipuiin sâwt zawka an hman ṭangkai theih nan a enkawltu department hrang hrangte an thawhho ṭhat a pawimawh thu sawiin Governor chuan, "Aizawl leh a chhehvel khaw hrang hrang tana faina kawnga hmasawnna thlentu a nih ngei theih nan a chhunga awmsa bawlhhlawh sawngbawlna khawl hrang hrangte hnathawk theia siam a pawimawh a ni," a ti bawk.

Ṭhutkhawmah hian Solid Waste Management Centre, Tuiriala Bio-medical Waste Management Centre kalpui dan tur te, awmze nei zawka Vermi-compost Unit kalpui dan tur leh khawtlang hruaitute kaltlanga chhungkaw tina bawlhhlawh thliar hran inzirtirna kalpui dan turte sawiho a ni.

He hunah hian Health & Family Welfare secretary Sangchhin Chinzah, UDPA secretary Lalmalsawma Pachuau, Municipal commisioner Joseph H Lalramsanga, Aizawl DC Lalhriatpuia, Aizawl Smart City Ltd. CEO CC Lalchuangkima, MPCB member secretary C Lalduhawma leh thawktu dangte an tel.