Hnahthialah Seminar on Cyber Crime

MJA Gen. Headquarters leh Home department ṭangkawp chuan nimin khan Horeb Conference Hall, Hnahthialah Seminar on Cyber Crime an buatsaih a, bialtu MLA Jeje Lalpekhlua'n a hmanpui.

Seminar hi MJA Gen. Hqrs. president C Lalrambuatsaiha'n kaihruaiin, Jeje Lalpekhlua chuan MJA-te chu sorkar hmalaknate mipui hnena puanzarsak ṭhin tura ngenin, "Sorkar khalh ngiltu tur in ni a, a ṭul hunah chuan tim hauh loin sorkar hi sawisel ṭhin ang che u," a ti.

Jeje Lalpekhlua chuan social media thil tih theihzia a takin kan tawng chho mek tih sawiin, "Social media kan hman thiam a ngai a, chutiang tur chuan ṭan kan lak tlan a ngai. Thubuai neih a awlsam em em," a ti a, mipui zirtir kawngah nasa lehzuala ṭan lak a ngaih thu a sawi.

Resource person Cyber Crime addl. SP Zonunsanga chuan cyber crime hrang hrangte leh a hremna dan hrang hrangte a sawifiah.

Zonunsanga sawi danin, Cyber Crime Police Station dinhmun, November 2020 hnu lamah Mizoramah cyber crime thubuai 287 ziahluh a ni tawh a, hemi kaihhnawihah hian mi 102 man an ni tawh. Mi 38 chuan cyber crime thubuai vangin thiam loh an chang.

Seminar-ah hian Hnahthial District MJA president F Zosangliana'n inlawmna thu sawiin, MJA Gen. Hqrs. general secretary K Zothanpara leh Hnahthial District MJA secretary VL Liansangate'n report tlangpui an pe.