Telecommunication leh mobile connectivity/service thlirho

Information & Communication Technology (ICT) department leh Mizoram Telecom Service Provider (TSP) hotute chuan nimin khan MSeGS conference hall-ah Mizorama telecommunication lama hmalakna leh mobile connectivity/service dinhmun an thlirho.

Thlirhona hi ICT secretary Amit Sharma-in a kaihruai a; Telecom Service Provider-ten Mizoram chhunga an hmalak mekna report pe in, mobile connectivity/service tih changtlunna tura an hmachhawp hrang hrangte an tarlang. Lengpui Airport-a mobile connectivity/service ṭha tawk lo chungchang pawh sawi niin, Lengpui Airport chu tihchangtlun mek leh hnathawh mek ni mahse, tun aia mobile connectivity leh service ṭha zawk a awm theih nan Service Provider-te chu a ranglama theihtawp chhuah tura ngen an ni.

Telecom Service Provider-ten Mizorama an hmalakna kawnga harsatna an tawh hrang hrangte sawiho a ni a, a ṭul angte State Broadband Committee (SBC) meeting-a sawiho tura chhawpchhuah ṭha an ti. Mobile tower leh radiation chungchanga mipui inzirtirna kalpui turin rawtna siam a ni bawk.

He hunah hian ICT department official-te leh Telecom Service Provider (TSP) hrang hrang - BSNL, Reliance Jio leh Airtel aiawhte an tel a ni.