TB Free Workplace Initiative hawng

Health & Family Welfare minister Lalrinpuii chuan nimin khan National Health Mission (NHM) hnuaia hmalakna, `National TB Elimination Programme leh Piramal Swasthya ṭangkawp buatsaih, ‘TB Free Workplace Initiative’ a hawng.

TB Free Workplace Initiative hawnna inkhawm New Capital Complex-a neihah minister Lalrinpuii chuan, "Mizoram hi TB umbona kawnga hmalaknaah India rama Model State ni turin sorkar laipuiin min rawn thlang a, state dangte entawn tur kan nih avangin kan hmalak dan turte hi uluk taka kan duan a ngai a, hetiang hmalakna innovative deuh mai kan official-ten an lo duang chhuak hi a lawmawm ka ti hle a ni,” a ti a; theihtawp chhuaha TB umbo a nih theih nana thawhhopuiah Mizoram mipui a sawm a ni.

Khawvel pumah TB umbo beihpuithlak mek a ni a, kum 2025-ah chuan TB natna tihrem hman tumin kawng hrang hranga hmalak a nih tawh hnuin ‘TB Free Workplace Initiative’ hi tun ṭuma hmalakna turin duan thar a ni leh ta a; he hmalakna kaltlang hian thawktute chuan damlo leh TB inringhlelte chauh endik tawh loin, mipuite chu an hnathawhna hmunah kalchilh a, a duh apiang tan test kalpui tum a ni.

He hmalakna hnuaiah hian ‘Portable digital X-ray machine’ leh AI assisted diagnostic software hmangin TB vei leh vei loh hi doctor-ten rang takin an endik nghal thei a ni.