Lungleiah environment humhalh inzirtir
Mizoram Legal Services Authority leh Lunglei District Legal Services Authority chuan nimin khan Lunglei College-a RUSA Hall-ah 'Public Education on Legal Services Environmental Protection, Sustainable Practices and Importance of Conservation' tih thupui zirhona an buatsaih a; Gauhati High Court judge Justice Michael Zothankhuma, Mizoram State Legal Services Authority executive chairman ni bawkin a hmanpui.
Justice Michael Zothankhuma chuan, Mizoram sik leh sa humhalh kawngah hmalak a pawimawh em avangin hetiang hun hi buatsaih loh theih loh a nih thu a sawi a, "Mizoram chauh ni loin, khawvel huapin sik leh sa a danglam zel a, boruak a lum zual zela, mihring tan a hreawm em em a, khawvel hi a tibuai a ni. Thil siam leh mihringte hian in laichinna kan nei a, mihring kan pung zela, kan ramngaw neih sa te, thing leh maute kan humhalh zel loh chuan engtik hunah emaw chuan a rem mai dawn tih hriain eizawnna avanga loh theih loha ram kan vat a nih pawhin duham loin kan mamawh chin bak ti chereu lo ang u," a ti.
Pawisa ringawt ngaihtuah lo tura mi tin chahin Justice Michael Zothankhuma chuan, "Kan chenna khawvel hi chen zelna tlak a nih theihna tura kan buatsaih a, kan tu leh fate lo la piang zel turte ngaihtuahin kan ram thing leh maute kan humhim angai hle," a ti a, ṭhangthar lo la awm zel turte tana chenna tlak khawvel a awm theih nana evironment humhalh kawnga theihtawp chhuah tur leh a tichhe thei zawnga hmala lo turin kalkhawmte a sawm.
Khualzahawm Justice Nelson Sailo, Gauhati High Court judge pawhin thu sawiin, "Kan ram sik leh sa humhalh a ngaih em avanga hetiang hun hi buatsaih a ni a, kan chenna khawvel boruak hi a inthlak nasa hle tih kan hre vek a, boruak a lum chak em em. Kan lui tlanah bawlhhlawh tinreng kan paih a, chumi tui chu kan in leh a, chuvangin kan environment siamṭha tura kan harh a hun tak meuh ta a ni," a ti.
He hunah hian Lunglei bawrhsap R Lalṭhazuala, DIG Southern Range Lalthanmawia bakah Lunglei SP, LMC hotu te, YMA Sub Hqrs hruaitute, Lunglei Gov't College Principal leh a thawhpuite, MJA-te leh mi pawimawh dangte an tel.
PUC Zoology department aṭangin Dr Vanramliana leh Project Save Tlawng aiawhin Lalthanmawii Kawlni-ten environment humhalh pawimawhna an zirtir a, zawhna leh chhanna hun hman nghal a ni.