College leh kohhran hruaitute inhmukhawm

Nimin khan Board of Theo-logical Education of the Senate of Serampore College (BTESSC) huaihawtin Hotel Regency-ah Senate of Serampore College hotute leh Mizoram Kohhran hrang hrang hruaitute an inhmukhawm a, thil pawimawh hrang hrang an sawiho.

Inhmuhkhawmnaah hian Senate of Serampore College aṭangin registrar Rev. Dr Limatula Longkumer, dean Rev. Dr Rodinmawia Ralte leh dean Dr Aswathy John-te an rawn kal a, Mizoram aṭangin Mizoram Synod, Baptist Church of Mizoram, Lairam Isua Krista Baptist Kohhran, Evangelical Church of Maraland leh Salvation Army aṭangin hruaitute an tel.

Inhmuhkhawmna hi theological education (Pathian thu zirna) leh kohhran inlaichinna a lo ngheh zel theih nan leh thawhhona ṭha a awm zel theih nana buatsaih niin an thusawiho pawimawh zualte chu - kohhrante hian Pathian thu zirna eng ang chiah nge kan duh tih te, engtiangin nge Senate of Serampore College hnuaia Pathian thu zirna hi kalpui ni se kan duh tih te, Bachelor of Divinity (BD) leh Bachelor of Theology Curriculum ennawn mekah kohhranin eng subject nge an ngaih pawimawh tihte a ni.

BTESSC hian an hotupa Rev. Dr Rodinmawia Ralte kaihhruainain India ram khawpui hrang hrangah hetiang inhmuhkhawmna hi kumin chhungin an lo buatsaih tawh. Kerala, New Delhi, Hyderabad, Chennai leh Guwahati-ahte kohhran hruaitu lawk chin ko khawmin hetiang inhmuhkhawmna hi an lo buatsaih tawh. Kolkata leh Mumbai leh hmun dangah pawh la buatsaih zel tum a ni.

Senate of Serampore College hnuaiah hian Affiliated College 70 vel a a mek a, India ram leh ṭhenawm ram - Bangladesh leh Sri Lanka-ahte Senate Affiliated College an awm. Mizoramah hian Senate Affiliated College pali - Aizawl Theological College, Academy of Integrated Christian Studies, Missionary Training College leh Maraland Theological College-te a awm mek.