Tuialhthei man tihniam tura ngenna NGOCC-in sorkarah an thlen dawn; Lirthei hmanga eizawngte din an tum

NGO Coordination Committee (NGOCC) hruaitute October 7, Thawhṭanni tlaia CYMA committee room-a ṭhukhawm chuan tuialhthei man tihniam leh tura sorkar ngen an rel. Hetihlai hian lirtheia eizawngte chu October 14 aṭangin an lirtheite an din tir dawn.

NGOCC chuan Mizoram sorkarin August 30, 2024-a notification chhuaha Mizoram chhunga petrol leh diesel hralh chhuah aṭanga chhiah an tihpun chu a sang lutukah an ngai a, "A san lutuk avang hian Mizoram mipuite tan phurit lian tak a ni. Chuvangin sorkarah tihniam leh tura ngenna siam nise," an ti.

An hmalakna kalpui a nih chhung chu eng pawl mah mipuite nghawng thei zawnga hma la rih lo turin NGOCC chuan an ngen.

Hetihlai hian October 7-a Mizoram Commercial Vehicle Union (MCVU) Gen. Headquarter executive meeting chuan tuialhthei man sang avang leh kawng dinhmun avangin October 14 aṭangin tiamchin awm loa din an rel.

MCVU chuan tuialhthei man tihniam turin September 16 leh 24 ah Chief Minister hmuin, September 17 ah Taxation Minister an hmu tih tarlangin, "Kan hlawhchham ta a ni," an ti.

Tuialhthei man a lo san veleh khan eizawnna atana lirthei hmangte a nghawng nghal tih an hriat thu tarlangin MCVU chuan, "Sorkarah rate up dil ve nghal mai a ṭha lawm ni kan ti a, amaherawh chu sumdawng motor zawng zawng rate a san chuan, nitin mamawh ei leh bar zawng zawng a nghawng nghal dawn," an ti a, mipuite harsatna siam tlem zawngin motor fare hrang hrang tisang loa tuialhthei man tihniam tura an ngen tak zawk thu an tarlang.

MCVU chuan an ngenna a hlawhtling ta lo pawi an tih thu tarlangin, "Tuialhthei man a hniam ngei theih nan a tawp thlengin kan ṭang dawn. Tuialhthei man tihhniam a nih hma chu October 14 zing dar 6 aṭangin tiam chin awm loa din a ni dawn," an ti. MCVU hian district tinah duty indah an tum.