Hun eng emaw chen tuialhthei phur lirtheite'n load an lak loh hnuah load an lak leh tawh a, Mizoramah tuialhthei phur eng emaw zat a rawn lut leh tawh a; tuialhthei erawh a la vâng rih thung.
September 21, 2024 zing dar 9 aṭanga nimin zing dar 9 thleng khan Vairengtea Supply check gate-ah Mizoram chhunga tuialhthei phur lut tur - diesel phur tank lorry 40 leh petrol phur tank lorry 39 an inhriattir a; Vairengte depot aṭanga phur leh Guwahati aṭanga phurte an ni.
Diesel phur tanker 40 zinga 11 chu Aizawla filling station hrang hranga dah tur an ni a, a bak chu khaw hrang hrang 24-a mi tur a ni. Petrol phur tanker 39 zinga 14 chu Aizawla filling station hrang hranga mi tur a ni a, a bak chu khaw hrang hrang 20-a mi tur a ni thung. Petrol phur tanker zinga pathum chu extra premium a ni a, Aizawlah trip hnih leh Selingah trip khat dah tur an ni.
Eirawngbawlna gas phur truck pawh Mizoramah eng emaw zat a rawn lut tawh a; September 21 zing dar 9 aṭanga nimin zing dar 9 thleng khan Vairengtea Supply check gate-ah eirawngbawlna gas phur truck 55 an inhriattir.
Tarlan tawh angin, Kawnpui leh Khamrang inkar kawng a chhiat lutuk avangin tuialhthei phurtu, Mizoram Oil Tanker Driver Association (MOTDA) leh Petroleum Entrepreneurs’ and Transporters’ Union of Mizoram (PETUM) chuan September 17 aṭang khan tuialhthei phur lirthei (tanker)-te an tlantir lo a ni.
Mizoram sorkar chuan kawng chhia thawm ṭha turin hma a la nghal a, kawng chhe zual laite thawm ṭhat a ni. Kawng thawm ṭhat chu September 20 khan MOTDA leh PETUM hruaitute'n an enfiah a, an duhthusam la ni lo mah se, tuialhtheiah Mizo mipuiin harsatna an tawh nasat tawh avangin an lirtheite tlantir leh an rêl a ni.
Oil tanker-te an tlan hnuah tanker eng emaw zatin filling station thleng tawh mah se, Aizawl leh Mizoram hmun dangahte tuialhthei a la vâng a; a duh apiangte tana lei theihna (free sale) filling station-ahte chuan lirtheite thui tak tak an intlar ṭhin.
Hetih lai hian, dan loa tuialhthei zawrh (black)-na hmun hrang hrangah erawh chuan lei tur a awm deuh reng a, petrol litre khat tling lo Rs 200-tein an zuar a ni.
