Buhfai man tihtoin Mizona thinlung A chawh thawh ka ring - FCSCA Minister

Nimin khan Vanapa Hall-ah Targetted Public Distribution System (TPDS) hnuaia beneficiary-te chanvo leh an harsatna chhâwk zângkhai dan (grievance redressal) inzirtirna buatsaih a ni a; khuallian Food, Civil Supplies & Consumer Affairs (FCSCA) minister B Lalchhanzova chuan buhfai man toin Mizona thinlung a chawh thawh a rin thu a sawi.

FCSCA Minister chuan, TPDS chungchanga hma a laknate sawi zauin, "Ration card var hmangte tana buhfai kg. khat Rs 30 ni tawh tur hian Mizona thinlung chawk thoin, rualkhai leh felfai zawka kan kal phah ngei ka ring. TPDS beneficiary-te thliar dan tur chungchangah pawh sorkarin ngaihtuahna nasa tak a sêng mek a ni," a ti.

Tute pawh hi anmahni zâwn ṭheuhah vantlang tana ṭangkaina nei thei vek an nih thu sawiin B Lalchhanzova chuan, "Chanvo pawimawh tak kan nei ṭheuh a ni," a ti a; retailer-te chu sorkarin an ṭânghma a ngai em em tih hria a, mipui tana ṭhahnemngai lehzual turin a fuih.

FCSCA secretary Zodingpuii'n inzirtirna hun a kaihruai a, FCSCA director Saizikpuii'n TPDS nihphung tlangpui a sawifiah. FCSCA deputy director Victor Lalawmpuia'n One Nation One Ration Card leh grievance redressal chungchangah a sawifiah bawk.

Awareness Campaign on TPDS Beneficiaries hi TPDS hnuaia beneficiary-te chanvo leh an harsatna chhâwk zângkhai dan kawnga inzirtirna a nih angin, retailer leh local council-te puala buatsaih a ni a; retailer leh lC-te bakah, tlawmngai pawl hrang hrang aiawhte an tel a ni.