Bána Kaih policy-ah thlai thar hralhna kan ngai pawimawh ber - Agri Minister

Agriculture & Farmer Welfare minisrter PC Vanlalruata chuan, Bána Kaih policy-ah thlai thar hralhna tur an ngaih pawimawh ber thu leh eptu party-te'n sorkar bei nasa hle mah se, theihtawp chhuahin ram tan hna an thawh zel dawn thu a sawi.

PC Vanlalruata hian nimin khan ZPM party pisaa inkhawmah thu a sawi a; Mizoram damna turin damdawi an zuar tih sawiin, "Kan damdawi zawrhte chu mipuiin ṭha tiin sorkarna min pe. Bána Kaih policy-ah hian thlai thar hralhna tur kan ngai pawimawh ber a, thlai thar wholesale-a zawrhna tur building sakna tur hmun hnih kan nei tawh," a ti.

Kut hnathawktute'n link road an mamawhte tihhlawhtlinsak ngei an tum thu sawiin Minister chuan, "ZPM sorkarah hian kum 10 chhungin chhungkaw tam tak an ding chhuak ngeiin ka ring a, kum 10 hnuah chuan Mizoram hian hmel thar a hmuh ngei ka beisei. Handholding policy hi Mizoram tan damna tur a nih ngei ka beisei a, kan policy hian a tum ber chu hmasawnna tluantling leh nghet a ni," a ti a; thlai thar hralhna market an ngaih pawimawh thu a sawi.

Agriculture Minister chuan, Bána Kaih policy-ah hlawhtling ngei turte sorkarin a ngai pawimawh dawn tih sawiin, "A thlawna sem ang kha a ni ve lo tih kan hriat a ṭha. Kum khat pawh kan la sorkar hmain opposition party-te'n min beihna tur ringawt zawngin min bei nasa a, keini chuan theihtawp chhuahin kan ram tan hna kan thawk zel dawn," a ti.

Sorkar kal tawhte'n Mizorama thlai thar hralhna an ngaihthah nia sawiin PC Vanlalruata chuan, "Keini chuan a takin hma kan la mek. Kut hnathawktute'n a man (rate) hre sain thlai an chíng tawh a, kan inzawrh dan ang ngeiin tunah pawh kan kal ṭan mek," a ti a; Aizawl daifem hmun palia thlai thar hralhna tur wholesale market sak an tumah hmun pahniha sakna tur cheng vbc. 10 an dawn tawh thu leh a hmun tur Sihphir leh Melthumah an en tawh thu a sawi.