Kolasib dist-a ram neitute kawng dan turin a huam loh turte tarlang

Kolasib District Land Owner’s Association (KDLOA) JAC chuan naktuk September 25, 2024 zing dar 6 aṭangin tiamchin awm loin RTP Farm bul, Seṭhawnah Vairengte-Aizawl inkar NH-06 kawng dan an tum a; kawng an danin a huam loh turte an tarlang.

KDLOA tarlan danin, kawngpui an danin a huam loh turte chu - fire & emergency service, medical duty, magistrate duty, police & force, sikul naupang hruai bus/lirthei, damlo phur lirthei eng chi pawh, tui sem, bawnghnute sem, two wheeler, three wheeler leh Mizoram chhung maxicab service (inter-state maxicab service tel loin)-te a ni. Ṭul bik thilah chuan JAC-te remtihna lak a ngai.

Silchar lam pana lirthei ruak chhuk thlate pawh huam chin neiin dan an ni dawn lo a; hei hian September 25, 2024 zanlai dar 12 thleng a huam dawn a, September 26 china mi chu chhuahtir loh an tum.

KDLOA chuan, "Hun rei tak chhung chinfel loha a awm vanga lungawi lohna lantir tur leh kan dikna chanvo humhalh nana road block kan neih tur hi Zoram mipui hriatthiamna kan ngen a, kan harsatnate min hriatpuia min thláwp tlat turin kan sáwm a che u," an ti.

KDLOA THIL PHÛT

1. Ram neitu nihna (ownership of land) hi sorkarin chingfel vat rawh se.

2. RRF Notification 1965 hi ram hmasawnna dâltu a ni a, ṭhiah ni rawh se.

3. Four lane project hi tihhlawhtlin ni rawh se.

4. Kum 3 chuang hma la thei loa kan ram min khuahkhirhna (freezing order) hi sorkarin sût rawh se.