YLA-in golden jubilee an lawm

Nimin, September 23 kha Young Lai Association (YLA) din champha vawi 50-na, golden jubilee a ni a, kawng hrang hrangin an lawm.

Central YLA president HC Vanlalruatpuia chuan YLA member-te golden jubilee duhsakna chibai a bûk a, "Chanhai riangvaite puiin, khawtlang, ram leh hnam tan YLA a ding zel dawn," a ti.

CYLA hruaitute chuan Lawngtlaia hmun pathum - Lairam Rescue Centre, Lairam Motherless Home leh District Jail-ahte thilpek an hlan a; zanah hmun hrang hrangah jubilee mei dêt a ni.

YLA golden jubilee hi branch hrang hrangin intihhlim nan, khawtlang tana thil ṭha tih nan, mi hmingṭha chawimawina hun atan, mi dang ṭanpui nan leh infuih tharna atante an hmang a ni.

Tun dinhmunah YLA-ah branch 119, sub-head-quarters pasarih leh group pahnih a awm a; member 56,000 an awm mek.