Electronic bungraw chhia thehthang leh sâwngbàwl dan zirhona buatsaih

Mizoram Pollution Control Board (MPCB) leh Hulladek Recycling company chuan nimin khan Taxation department auditorium-ah electronic bungraw chhia (e-waste) thehthang leh sâwngbàwl dan zirhona an buatsaih a, MPCB chairman Liankima Lailung-in a hmanpui.

E-Waste Management Workshop-ah hian sorkar department ṭhenkhata hotute leh Aizawla zirlai te, electronics bungraw kaihhnawih zuar leh siam ṭhinte an tel. Zirhonaa telte chuan e-waste titlem tur leh dan dik taka thehthang zel tawh turin thu an tiam a ni.

MPCB leh Hulladek Recycling-a mithiamte'n thil pawimawhte an sawifiah a; E-Waste Management Rules pawimawhna leh siam a nih chhan te, e-waste thehthang chungchanga mipui leh a hmangtute mawhphurhna leh e-waste tihtlêm pawimawhna leh tihtlem dan turte zirho a ni.

MPCB Chairman chuan, electronic bungraw chhiate chu phalna neite (e-waste Collector) hnenah chauh thehthang tur a nih thu sawiin, "Phalna pe theitu chu Pollution Control Board-te an ni. Collector-te hian store/stock chiah an ti thei a, an ṭhiat darhin an phelh darh thiang lo," a ti.

Liankima Lailung chuan, "E-waste aia hlauhawm bawlhhlawh dang a awm lo tih theih a ni a, chuvangin, a hranin dan pawh siam a ni. Khua leh tui ṭha chuan thu awih takin dan kan zâwm mai tur a ni," a ti a; zirhonaa telte chu dan dik taka e-waste thehthang kawnga ke pên hmasa ni turin a sáwm.

MPCB tarlan danin, electronic waste zingah chhiatna nasa zawk thlen thei thilte a awm avang leh environment vawn thianghlim zel nan te, company lama thawn lêta recycle theih thilte a nih avangin bawlhhlawh dang anga paih a thiang lo a, e-waste khawn khawm tura Pollution Controcl Board-in phalna a pekte hnenah chauh pek tur a ni. Hulladek Recycling company hi electronic bungraw chhiate khawn khawmtu an ni.