Sumdawnna bul ṭanna tura intihsiakna Rahbi 5.0 Chief Secretary-in a hawng

Planning & Programme Implementation Department hnuaia Mizoram Startup Mission kaltlanga buatsaih tur Mizoram Rahbi 5.0 chu nimin tlai khan chief secretary Dr Renu Sharma-i'n a pisaah a hawng.

Mizoram Rahbi 5.0 hian Mizoram chu a chhunga chengte leh chìn dan thar, danglam bik hmangtea mahni kutke ngeia ding thei tura hlankai chu a tum bulpui a ni. Intihsiakna te, sumdawnna lam inzirtirna leh inkaihhruaina te, sumdawng dangte nena inthlun zawmna, thil hralhna tur ngaihtuah leh pawimawh dangte a huam.

Chief Secretary chuan, Mizoram Rahbi 5.0 kalpui tur chu sorkar hmalakna pawimawh a nih thu a sawi a, "Sumdawnnaah chìn dan thar leh dangdai deuh ngaihtuah chhuak a, eizawnna ngêlnghet siam bakah state sum leh pai dinhmun siamṭhat kawnga hmalakna a ni a, sumdawnna leh eizawnna kawnga bul ṭan tum, hmabak êng takte chawikanna tura ruahman a ni," a ti.

Mizoram Rahbi 5.0 hmanga intihsiaknaah Mizoram mi leh sa, tun hnaia sumdawnna lama hma la leh a tuite an tel thei dawn tih sawiin Dr Renu Sharma chuan, "Hemi kaltlanga ti ṭha thlan chhuahte chuan Rs 7,50,000 thleng ṭanpuina an dawng thei dawn," a ti a; Rahbi 5.0 chu Mizoram tana sundawnna kawnga hmalakna thar, ṭha leh hlawhtling a nih theih nan a tam thei ang ber tel tum turin mipui a sáwm.

Ruahman dan chuan Mizoram Rahbi 5.0-a tel duh tan October 31, 2024 thleng dilna hun hawn a ni dawn. Dilna thehluttute chu November 5-6 chhungin business plan siam dan zirtir an ni dawn a, November 7-ah sumdawnna sawifiah dan zirtir an ni ang a, November 18 ral hmain business plan an buatsaih an thehlut ang.

November 22-ah intihsiak-naa tel zel theite chinfel a ni dawn a; thlan chhuahte tan hian November 26-28 chhungin sumdawnna chungchang leh sawifiah dante zirtirna buatsaih a ni ang a, December 2-ah final lutte puan a ni ang. December 5-6 chhungin boot camp a ni dawn a, December 11-ah sumdawnna chungchang sawifiahna leh inzirtirna hnuhnung ber buatsaih leh tum a ni.

December 12-ah final result puan a ni dawn a; Mizoram Rahbi 5.0 hnuaia hamṭhatna dawng tura thlante'n December 16, 2024-ah final business plan an thehlut ang.

Mizoram Rahbi 5.0 chungchang hre chiang duh tan Mizoram Startup Hub, Planning & Programme Implementation deparment-ah zawhfiah theih a ni a; dilna chu office-ah leh website www.startupmizoram.com ah ngaihven theih a ni.