Sum leh pai enkawl leh kawngpui enkawla hlawhchhamah sorkar puh

MNF treasurer Lalruatkima chuan, MNF party chu Mizoram leh Mizo hnam venghimtu, Mizo guardian niin a sawi a; ZPM kaihhruai sorkar chu sum leh pai enkawl leh kawngpui enkawla hlawhchhamah a puh.

Nimina Mizo Hnam Rûna inkhawma thusawitu Lalruatkima chuan, Mizo ram leh hnam tana nunna thâptute ininpekna chu Mizote thinlungah a nung reng tawh dawn niin a sawi a, "MNF hi party mai a ni lo a, Mizoram leh hnam sakhua venghimtu Mizo guardian a ni. Kan hnam pasalṭha martarte hniakhnung zuia kan ram leh kan sakhua venghimtu kan nihna hriaa beidawng mai tur kan ni lo," a ti.

Lalruatkima chuan, "ZPM sorkar Council of Minister hmasa berte'n ZMC leh Lengpui Airport hralh an tum a hlawhchham a, ni 100 chhung hmalakna tur hmachhawp a hlawhchham a, hmunphiah lei a hlawhchham a, a chingtute an beidawng. Sum leh pai enkawl leh kawngpui enkawlah an hlawhchham bawk," a ti a; chhiah an tihpun avangin Mizoram chu hmarchhak state-a tuialhthei man sanna ber niin a sawi.

MNF Treasurer chuan, ZPM sorkar hnuah kawngpui a ṭhat loh thu te, kawngpui a ṭhat loh laiin Chief Minister in bul chu blacktopping-a chei ṭhat a nih thu te, Assembly Speaker enkawl nan thla 9 chhungin cheng nuai 65.23 hman a nih thute a sawi a, "Assembly Speaker lungtât a par em ni?" a ti.

Lalruatkima chuan, Congress party chu tuna an hruaitute hun (term) kum 2029 thleng pawhsei a nih avangin an party chhung boruak a ṭha lo hle niin a sawi a; MNF party chu rei lo têah an sorkar leh thuai dawn niin a sawi bawk.