KHAWTHLIR

PYD-in thisen pe

PYD Haulawng Bial chuan nimin khan UPC Lamṭhuamthum kohhran hall-ah thisen pek huaihawtin, Lunglei Civil Hospital tan thisen unit 61 an pe a, petute mipa 55 leh hmeichhia paruk an ni.

Lehkhabu tlangzarh

'Thuthlung Thar Theology' tih lehkhabu chu nimin khan Synod moderator Rev. R Vanlalnghaka'n Synod Conference Centre-ah a tlangzarh. Lehkhabu hi Mizo zinga Pathian thua doctorate degree nei hmasa ber Rev. Rev. Dr Zaihmingthanga kum 80 tlin puala Rev. PC Nghaklianmawia leh Rev.Dr H Joseph Lalfakawma ten an buatsaih a ni a; Thuthlung Thar zir bingtu mi 20-te'n Thuthlung Thara thupui hrang hrang an zirna leh chhuina thuziakte dah khawm niin, Rs 500 man a ni.

Faina beihpui thlak dan tur rêl

Nimin khan Khawzawl additional DC Lalfakzuala hoin DC conference hall-ah District Sanitation Task Force an ṭhukhawm a, September 25 aṭanga October 2 chunga Mizoram puma Faina Hapta (Mizoram Cleanliness Week) hman tur an sawiho. Faina Haptya chhungin zirna hmun, pisa leh khawtlang hmun hrang hrangte tihfai intihsiakna neih an rêl a; bawlhhlawh paih duhdah leh chil chhâk khap ní hman an rawt bawk.

MLA-in hmanpui

Baptist Higher Secondary School (BHSS) chuan nimin khan Lena Stadium, Lungleiah Annual Sports an ṭan a, Lunglei HPC vice chairman V Malsawmtluanga, bialtu MLA-in a hawng. V Malsawmtluanga chuan, zirnaah leh thil tihna hrang hrangah thiam thei bik an awm theih rualin, kawng hrang hranga intlansiaknaah pakhatna nih kher loh pawhin a tawp thlen tum tlat a pawimawh thu a sawi. BHSS hi pawl 9-12 zirna a ni a, zirlai 950 vel an awm mek a ni.