Ei leh in thianghlimna kawnga hmasawn theih dan tur sawiho

Lunglei District Advisory Committee on Safe Food & Healthy Diets chu nimin khan additional DC James Miahlung kaihhruaiin DC Conference Hall-ah an ṭhu a; ei leh in hrisel leh thianghlimna lama hmasawn theihna tur ruahmannate an ngaihtuah.

Ṭhutkhawmah hian October 2024 chawlhkar khatnaah ei leh in siamna hmunte tlawh kual a, tehfung hrang hrang hmanga endik an rel a; October chawlhkar hnihna chhungin ei leh in siamtu hotel, restaurant, bakery leh catering neitute tan ei in hrisel leh thianghlim siam leh zawrh chungchang inzirtirna ni se, an ti.

Sorkar pisa canteen-te pawh faina, hriselna leh thianghlimna ngai pawimawh tura hriattir turin an hotu (head of office)-te hnenah ngenna pek ni se, an ti a; Lunglei Municipal Council huam chhunga bakery leh mahni in lama ei tur siam ṭhin, sorkara la inziak lut lote chu inziak lut vek turin local council kaltlanga hriattirna chhuah turin hmalak an rêl bawk.

Committee-in ruahmannate a siamte chu a thawh khatnaah LMC huam chhunga kalpui tura tih a ni a, a thawh hnihnaah Lunglei district chhung khaw kar kawnga hotel leh restaurant-te endik tum a ni. Ṭhutkhawmah hian sorkar official-te bakah hotel leh bakery neitu pawl aiawhte an tel.