SASCI hnuaia hmeichhe hostel 7 sak dan tur CM hoin sawiho a ni

State Level Committee on SASCI (Special Assistance to States for Capital Investment) chu nimin khan chairman Lalduhoma, chief minister hoin CMO Conference Hall-ah an ṭhu a; SASCI Part X, 2024-25 aṭanga Working Women Hostel hmun pasariha sak dan tur an rêl.

Ṭhutkhawmah hian PWD minister Vanlalhlana, Social Welfare & Tribal Affairs minister Lalrinpuii, LESDE minister Lalnghinglova Hmar, adviser to CM TBC Lalvenchhunga leh member dangte an tel.

Sorkar thuchhuah tarlan danin, ṭhutkhawmah hian PWD hotute'n PWD-in working women hostel sak tur an ruahman dante an sawifiah a; hostel pasarih sakna atana sum ruahman zawng zawng chu vbc. 127 a ni. Women hostel sak turte chu a puitlin hunah kaihhruaina angin amaha a inenkawl zel theih nan public private partnership (PPP) anga enkawl zui a ni ang.

Working women hostel sakna tura rawtte chu - ZMC complex, Ramhlun Sports Complex, Aizawl ITI Complex, Khatla, Lunglei Ramthar Veng, Thenzawl Field Veng leh Champhai Kahrawt te a ni a; hostel len zawng a inang vek dawn lo a, a ṭhen chu khum 140 awm theihna tur a nih laiin, a ṭhen chu khum 40 awm theihna tur a ni.