Saitualah Mission Shakti hawng

Saitual bawrhsap Dr Lalngura Tlau chuan nimin khan DC Conference Hall-ah Mission Shakti leh District Level Implementing Committee a hawng.

Hawnna inkhawmah hian Samarthya nodal officer Lalrammawii Kawilam-in District Hub for Empowerment (DHEW) awmzia leh thil tumte a sawifiah a, "Mission Shakti hnuaia hmeichhe tana scheme awm zawng zawng khaikhawmtu a ni a, hmeichhiate hlei-hlenna laka humhimna leh kawng hrang hranga an hmasawnna leh chawikanna tura din a ni," a ti.

Mission Shakti chungchang sawifiahtu district programme officer Dr Lalhruaitluangi Chhangte chuan, Mission Shakti hnuaiah chuan sub-scheme pahnih - Samarthya (hmeichhe chawikanna) leh Sambal (hmeichhe humhimna) a awm thu a sawi a; Sambal nodal officer Flora Lalṭanpuii'n hmeichhiate humhimna chungchang a sawifiah bawk.

Mission Shakti nodal department chu Women and Child Development a ni a, a hnuaiah District Hub for Empowerment (DHEW) awmin, chumi hnuaiah chuan District Level Implementing Committee on Mission Shakti din leh a ni.