Kolasib District Truck Owner Association (KDTOA), Kolasib district MTA, Kolasib Sub-Hqrs MTDA leh Kawnpui Town Driver's Association (KTDA)-te chuan National Highway no. 54/306/06 kawngpui a chhiat êm avangin August 22, 2024 (Ningani) chawhhma dar 10 aṭang chuan Kolasib district-a NH kawngpuite lirtheia zawh lo turin mi tin an chah.
Pawl pali hruaitute hian nimin khan Kolasib Press Club-ah thuthar thehdarhtute an kâwm a; Kolasib district chhunga NH kawngpui a chhiat lutuk avangin hmalak dan tur August 18, 2024 khan an ngaihtuah a, August 22, 2024 aṭang chuan tiam chin awm loa kawngpui zawh tawh loh an rêl tih an puang a ni.
Mizoram châk lakna kawngpui pawimawh ber (NH 54/306/06) chu hun rei tak a chhe tawh a, harsatna hrang hrang a thleng tawh tih sawiin pawl palite chuan, "Kolasib Bawrhsap kaihhruainain Kolasib-a NGO leh lirthei enkawltu pawl hrang hrang aiawhte'n joint meeting vawi tam tak an lo neih tawhah, March 2024 chhunga Vairengte-Sairang leh Bairabi-Kolasib kawngpuite fûr chhiat hmaa harsatna kan tawh lohna tura ruahmanna leh hmalakna chuan ngaih pawimawh a hlawh lo hi a pawi kan tiin lungchhiatthlak kan ti tak zet," an ti.
Kawngpui chu NHIDCL leh contractor-te'n lirthei zawh ngam loh khawpa chhiain an chhuah tih sawiin, "Lirthei eng chi pawhin an zawh ngam theih tur kawngpui ṭha kan neih thuai theihna atan 22.8.2024 chawhma dar 10 aṭang hian tiam chin awm loin Kolasib district-a NH-te hi lirthei eng chi mahin zawh lo turin kan inngen," an ti a; an ngenna chu zâwm turin mi tin an ngen a, lirthei tlan luite'n harsatna an tâwk a nih pawhin an cho chhuaha an ngaih tur thu an tarlang.
KDTOA, MTA, MTDA leh KTDA hruaitute chuan, PWD Minister leh Kolasib bialtu MLA (Deputy Speaker)-te'n kawngpui chhiate chei ṭha thuai tura NHIDCL leh contructor-te an ngenna pawh zahlo leh pawisa duh lotu NHIDCL leh an hnuaia contractor-te hi Kolasib district aṭangin August 2024 ral hma ngeia inla chhuak tur leh, an aiawh contractor hna thawk thei ngei tur rawn dah thuai turin Mizoram sorkar kan ngenin kan phût a ni," an ti.
Pawl palite chuan, kawngpui ṭha an neihna tura an hmalaknate chu hlâwkna atan hman tum lo tur leh party inchirhthehna atan hmang lo turin political party tin an ngen a; an hmalakna chu Zoram mipui tan a ni tih hriaa thláwp vek turin mipui an ngen.
Lirthei an tlân loh avanga harsatna lian a awm loh nan lo inruahman lâwk thiam turin chhung tin an ngen a; thil man tihto phah lo turin sumdawngtute an chah bawk.
KDTOA, MTA, MTDA leh KTDA-te'n Kolasib district-a lirthei tlân loh an tih hian dan leh thupek kengkawhtu te, zirlai hruaitu lirthei te, PHE leh Power & Electricity-a thawk te, dam lohna leh chhiat tawhna vanga harsatna tâwk (an awmna YMA branch president & secretary hriatpuina lehkha nei) te, MJA member/press mite leh bawnghnute semtute a huam dawn lo a ni.
