Mizorama HIV vei nu zingah nautea kai chhâwng an tlem

Mizoram State Council on AIDS chu nimin khan an chairman chief minister Lalduhoma kaihhruaiin CMO conference hall-ah an ṭhukhawm. Nikum 2023 khan Mizorama HIV vei nu, nau hring mi 120 zinga pahnih chiahin an nauteah HIV an kai chhâwng tih tarlan a ni.

Ṭhutkhawma tarlan danin, HIV vei hmeichhiate'n nau an paiin an naute chu HIV lakah ven theih a ni a, nu aṭanga nautea HIV inkai chhàwn chu tihbo tuma ṭan lak mek a ni. Kum 2023 chhung khan HIV vei nu nau hring mi 120 zingah nautea HIV kai chhâwng pahnih an awm a, mi dang 118 chuan an kai chhâwng lo.

National AIDS Control Organization (NACO) hnuaia mithiamte'n kum 2023-a Mizoram dinhmun an chhût danin, Mizorama puitling zinga 2.73% chu HIV kai thei (state wise Adult HIV prevalence in % in 2023) dinhmuna ding an ni a; hei hi India ramah a sáng fál hle a, national level chu 0.2% chauh a ni.

Mizoram HIV prevalence rate a san chhan chu Mizoramah HIV vei hmuh chhuah tam vanglai (peak level) a thlen tlai bik vanga ngaih a ni. Kum 2017 khan Mizoramah peak level a thleng chauha ngaih a ni a, HIV vei tamna state dangte chuan kum 2005 velah peak level an thleng tawh hlawm.

Mizoramin peak level a thlen hnu hian HIV vei hmuh chhuah thar zat a tlahniam zui ve hret hret a; MSACS thawktute chuan tuna a kal dan anga HIV/AIDS dona ṭha taka a kal zel chuan a darh zel tur khuahkhirh theih hun a thlen theih an ring.

MSACS project director Dr Lalthlengliani sawi danin, Mizorama HIV vei zingah anti retroviral thehrapy (ART) damdawi ei mek mi 16,217 chhinchhiah a ni a, chu'ng zinga mi 500 vel chu ram dang mi an ni.

HIV vei hmuh chhuah zingah ART damdawi ei duh lo, chhui zui theih loh mi 633 an awm a; MSACS hian district tinah ICTC leh ART an nei vek a ni. HIV vanga thi chhinchhiah zat chu mi 5,021 an ni.

Ṭhutkhawmah hian minister pahnih - Vanlalhlana leh PC Vanlalruata bakah, State Council on AIDS member-te an tel a; HIV/AIDS donaa hmalak zel dan turte an rêl a ni.