AMC by-election campaign hun vawiinah a tâwp dawn

August 22, 2024, tun kar Ningania Aizawl Municipal Corporation (AMC) Ward-VI (general seat) by-election atan political party-te leh candidate-te ngawrh takin an campaign mek a; vawiin tlai dar 4 hian campaign theih hun a tâwp dawn.

AMC Ward-VI by-election neih turah hian candidate pathum an awm a; chu'ngte chu - BJP candidate Chawng­hmingthanga, Zarkawt, ZPM candidate H Lalremtluanga, Chanmari West leh independent candidate Lalrinfeli, Chanmari West-te an ni.

AMC Ward-VI hian Chanmari West, Edenthar Veng leh Hunthar Vengte a huam a, polling station 10 a awm. Corporator John Zosangliana Ralte chu March 21, 2024 khan a thi a, a hmun ruak hnawhkhat turin by-election buatsaih a ni dawn a ni.

By-election-ah hian August 22 zing dar 7 aṭanga tlai dar 4 thleng vote thlâk hun hawn a ni ang a, vote tlate chu August 26, 2024-ah chhiar a ni ang.