Geology & Mining-in 2023-24 chhungin Sorkarah Rs 12,54,91,153 an chhûng

Commerce & Industries department leh Directorate of Geology & Mining bultumin nimin khan Secretariat conference hall-ah State Geological Programming Board (SGPB) ṭhutkhawm vawi 29-na neih a ni a; kum 2023-24 khan Geology & Mining-in sorkar sum báwmah chhiah (revenue) Rs 12,54,91,153 an chhûng lut tih tarlan a ni.

Ṭhutkhawm hi chairman Dr Lalzirmawia Chhangte, Commerce & Industries secretary-in a kaihruai a; kum 2023-2024 chhunga Directorate of Geology & Mining leh Geological Survey of India (Tripura-Mizoram Circle) hnathawh hrang hrangte tarlan niin, kum kal mek 2024-25 chhunga hmachhawpte sawiho a ni. Geology & Mining Annual Report 2023-24 tlangzarh a ni bawk.

Ṭhutkhawma tarlan danin, sorkar kum liam ta 2023-24 chhung khan Geology & Mining-in sorkar sum báwmah Rs 12,54,91,153 an chhûng lut a; chu'ngte chu - minor mineral (lung, balu, etc) aṭangin chhiah (non-tax revenue) Rs 11,25,69,183, Petroleum Exploration Licence (PEL) fee aṭangin Rs 1,24,99,890 leh laboratory testing fee aṭangin Rs 4,22,080 a ni. Geology & Mining-ah hian sanctioned post 86 a awm a, thawktu nghet 48 an awm mek.

Kum 2023-24 chhung khan Geology & Mining hman tur dan thar pahnih - The Mizoram Minor Minerals (Concession & Prevention of Illegal Mining) Rules, 2023 leh The District Mineral Foundation Rules of Mizoram, 2023-te Mizoram Legislative Assemby-ah August 22, 2023 khan pharh a ni a; Mizoram Gazette Notification dt. 4th October, 2023-ah chhuah niin, hman mek a ni.