Huai takin zirtirtu kan sem rual dawn - Education Minister

Education minister Dr Vanlalthlana chuan, zirtirtu sem rual an tum chu huai taka an kalpui dawn thu leh, thingtlang lama rei tak awm tawhte leh khawpuia awm rei tawhte sawn chhuah ngai an awm thu a sawi.

Minister Dr Vanlalthlana hian nimin khan ZPM pisaa inkhawmah thu sawiin, "Zirtirtu sem rual hi huai takin kan kalpui dawn a, transfer dan phung fel zawk, thingtlang lama rei tak awm tawhte leh khawpuia awm rei tawh sawn chhuah ngaite an awm. Hei hian kan zirna hi a siamṭha dawn em tih ngaihtuah chungin fimkhur leh dik taka kalpui kan tum," a ti.

ZPM manifesto-ah Education department-a zirtirtu sem rual huai taka kaltlangpui an tum a, an thawk mek tih sawiin Dr Vanlalthlana chuan, "Intihhuaisen leh intih­hmingṭhat tum vanga kalpui kan ni lo a, tu pawh minister se an tih tur a ni," a ti a; minister-te chu party manifesto tipui­tling tura ruat an ni a, mani­festo tihpuitlin chu an hna a nih thu a sawi.

Dr Vanlalthlana chuan, thingtlanga rei tak awm tawh leh khawpuia awm rei tawh sawn chhuah ngai an awm thu sawiin, "Hei hian kan zirna hi a siamṭha dawn em tih ngaihtuah chungin fimkhur leh dik taka kalpui kan tum. Education Consultant leh Education Reforms Committee kan nei a, an ruahmanna hnuaiah kum thum chhunga education kan kalpui dan tur kan duang tawh a, zirna aṭangin moral reform siam kan tum. Ram siamṭha tur hian huaisen a ngai a, mi dawihzep tan siamṭhat theih a ni lo," a ti.

Education Minister chuan, sorkar hmasate a páwnga takin an sawisel ngawt lo tih sawiin, "Thil ṭha tam tak min tihsak tawh tih kan sawi ṭhin a, heti chunga sorkar hmasate engmah ti lo leh chhe tak anga sawi chhuak ṭhina min puh fona hi a dik tâwk lo. Sawisel an ṭulnaah kan sawisel a, fak an ṭul hunah kan fak mai dawn," a ti a; Chief Minister huaisen an nei a, ṭha nia an hriatah chuan huaisen takin an kal zel dawn thu a sawi.

Tih dan thiam tawk loh thil pawh tam tak a awm thei tih sawiin Vanlalthlana chuan, "Sorkar kal tawhte'n an tih ngam loh thil ṭha tak tak ti turin ke kan pên mek a, kalphung thar pakhat chu a ni tawh. Sawiselna tam tak kan tâwk chho a, kan insiamṭhatna tur pawh a awm ang. Thil ṭha a nih chuan huai taka din tlang zel kan tum," a ti.

Dr Vanlalthlana chuan, an party manifesto en chungin taima taka an thawh a ngai tih sawiin, "Mipuite'n min tehna tur chu kan manifesto kan tihlawhtling em tih a nih dawn avangin hahchâwl hman kan ni lo. Rah ṭha tak lawh tur kan chíng ṭan mek a, kan hlawhtlin hma chu kan bei zel ang," a ti a; mipui beiseina tihthlawn loh chu an tum ber a nih thu a sawi.

Education Minister sawi danin, sorkarin report a neih thar berah chuan Mizoramah sorkar sikul 257-ah zirlai 1,30,000 vel an awm a, zirtirtu 10,000 vel an awm a ni.