MPCC-in Home Minister an dem

Congress party chuan thuchhuah siamin, BSUP, Edenthar Venga chengte vauna anga ngaih theih thu minister K Sapdanga'n Edenthar ZPM Group-a a dah chu pawi an tih thu an tarlang a, "Hetianga voter-te vauna ṭawngkam ang hi tun hmain Mizoram politics-ah kan la hmelhriat ngai lo," an ti.

MPCC chuan, Edenthar BSUP chu AMC by-election neihna tur huam chhunga awm a nih thu sawiin, Home Minister thil tih dan chu rethei leh harsa zawkte hmuhsitna leh hnuaichhiahna, an duh vote thei tura zalenna palzût tumnaa an ngaih thu leh, Model Code of Conduct leh RP Act, 1951 bawhchhiatnaa an ngaih thu an tarlang.

Congress party chuan, BSUP chu Congress sorkar laia sak a nih thu an tarlang a, "Congress party-in mirethei kan vau ve ngai lo a, mirethei sorkar kan din ṭhin a, miretheite'n lei rem an rah theih nan policy leh programme kan siam ṭhin. Mi retheite vau hi kan tih ve ngai loh a ni," an ti.