KHAWTHLIR

Kuhva phurh khap

Champhai district bawrhsap VL Remliana chuan thupek chhuahin, Champhai district-ah ram dang aṭanga dan loa kuhva ro lak luh, dah khawl, phurh chhuah leh district chhunga phurh kual khap a nih thu a puang. Thupek zâwm lote chu BNS, 2023 Section 221 hmanga hrem theih an nih thu a tarlang.

Gas home delivery chungchang sawiho

Khawzawl bawrhsap K Vanlalṭhiana kaihhruaiin nimin khan Mizoram sorkarin eirawngbawlna gas home delivery chungchanga thupek a chhuah tawh a nihna ang tura kalpui dan tur sawiho a ni. Mihring indaih lohna te, LPG bûr (cylinder) indaih lohna te, gas inpek hun duh dan inang lote leh harsatna dang sutkian dan tur an rêl a; chutiang sutkian chhung leh hmalakna zo fel turin September 18, 2024 chu hun tawp atan an ruat a ni.

MNWF inkhawm

MNF party chuan nimin khan an pisaah Mizo National Women Front (MNWF) pualin inkhawm an nei a, MNWF vice president B Lalawmpuii, AMC executive corporator-in kaihruaiin, Zakapa Award dawng tawh Dr Lalrinawmi Ralte-in thu a sawi.

Births & Deaths chungchang sawiho

Inter Departmental Coordination Committee on Civil Registration System chu nimin khan Births & Deaths chief registrar Lalmalsawma Pachuau, Planning secretary ni bawk hoin Planning committee room-ah an ṭhukhawm a; an ngaihtuah zingah birth certificate-a non-tribal hming, Zo hnahthlak tribal hminga thlak phal loh chungchang a tel. Electoral roll-a inthun thar dilte tana birth certificate digitised chauh hman chungchang te, Delayed Registration of Births & Deaths dilna form man siamṭhat chungchangte an rêl bawk.

CCTV dah tur

Lawngtlai DC Cheemala Siva Gopal Reddy chuan thupek chhuahin, Lawngtlai district-a damdawi Schedule H leh X zuarte chu an dawr chhungah CCTV dah vek turin a hriattir a, "CCTV hi rintlak khawpa ṭha a ni tur a ni a, dawr chhung leh damdawi leitute a cover tur a ni," a ti. Thupek zâwm lote chu BNS, 2023 Section 223 hmanga hrem theih an nih thu a tarlang.