Star Farm-in dan bawhchhe loah inngai
Star Farm neitu Malsawmi chuan nimin khan Aizawl Press Club-ah thuthar thehdarhtute a kâwm a; Mizoram pawn aṭanga vawk an lak luh leh vawksa an sâwngbàwlnaah dan bawhchhiat an neih loh thu a sawi.
Malsawmi hian dan leh thupek bawhchhiaa puha police-in an man nia sawi chungchangah jail-a táng anga ngaitu an awm avangin thil awmzia a sawifiah a; "Dan kan bawhchhe lo chung leh Star Farm vawksaah ASF finfiahna a awm lo chungin ka chungah FIR file a nih avangin Bawngkawn police-te'n min ko a, scooty-in kan kal a, ka statement an lak chhung minute 30 vel Bawngkawn PS-ah kan va awm a, statement an la zo a, farm-ah kan kal nghal a ni," a ti.
Star Farm neitu chuan, dan bawhchhiat an nei lo nia sawiin, "Dan (law) aia association thu leh hla a lal zawkna ram kan ni ta mai em ni? Dan leh sorkar guideline/action plan ten awmzia a neih loh chuan ṭhalai, manufacturing leh processing-a tui, rawn ti turte tan kawng a ping dawn a ni," a ti a; ASF National Action Plan-ah ASF lênna hmun aṭanga hri lên lohna hmuna vawksa lak phal a nih loh laiin, ASF lên lohna hmun aṭanga ASF lênna hmuna vawksa lak luh khap a nih loh thu a sawi.
Malsawmi chuan, State Executive Committee, Mizoram State Disaster Management Authority Chairman (Chief Secretary)-in May 24, 2024-a thupek a chhuahah, Mizoram pawn aṭanga vawksa lak luh khap thu a puan chungchangah sorkar laipui lama hotute thurâwn angin RTI Act hmanga a zawh chian mek thu a sawi a, "NDMA notified disaster-a tel lo ASF-ah hian engtin nge Disaster Act 2005 hmanga order siam a nih theih, tiin ka zawt a, chhânna ka nghak mek," a ti a; ASF leng chu disaster list-ah a tel lo niin a sawi.
Star Farm neitu sawi danin, June 12, 2024-a vety doctor-te'n Bung Banglaa Slaughter House-a Star Farm vawk kawchhung sample 10 an endikna, June 18-a result a hmuhah paruk a negative a, pali erawh chu rinhlelhawm (doubtful) tih a ni a; endik nawn (re-test) tur tih a ni.
State páwna endik turin sorkar (AH&Vety)-in an thawn a ngaih avangin July 8, 2024-ah AH&Vety department-ah dilna a thehlut a; mahse, AH&Vety chuan July 12-ah chhângin, an thawn theih loh thu an hrilh a ni.