Hmeichhe invên dan tur inzirtir ṭan

Saitual district bawrhsap Dr Lalngura Tlau chuan nimin khan Saitual district-a hmasa ber ni turin Saitual High School assembly hall-ah Pipe Band Academy leh hmeichhe naupangte mahni inven dan tur zirtirna, Rani Lakshmi Bai Atma Raksha Prashikshan (self defence for girls programme) a hawng.

Self defence training hi Saitual district-a middle school, high school leh higher secondary school-a zirlai hmeichhiate tana ruahman a ni a; taekwondo zirtirtu (black belt) mi pangate'n nimin khan an zirtir ṭan nghal.

Pipe Band Academy hi PAB 2023-2024 in a pawm tawh angin kumin hian district 10-ah din tur a ni a; Saituala Samagra Shiksha District Project Office chuan Saitual H/S chu Pipe Band Academy dinna atan an thlang. Pipe band bul ṭanna atan Rs 4,00,000 hmuh a ni a, Samagra office sum nen kalpui mek a ni.

Pipe band hi pawl 9 zirlaite tana ruahman a ni a, August 7, 2024 zing kar aṭang khan kalpui a ni.

Dr Lalngura Tlau chuan, sorkar ni pawimawh Independence Day leh Republic Day-ahte páwn lam mite tihbuai ngai loa an district chhunga H/S naupangte'n pipe band an nei ve thei tawh tur chu a lawmawm a tih thu a sawi a; ṭhahnemngai taka zir a, pipe band intihsiakna atante pawh inhmakhua turin zirlaite a chah.

Hmeichhiate an him lo thei tih sawiin Saitual DC chuan, "Hmeichhiate an invenhim theih dan tur inzirtirna Rani Lakshmi Bai Atma Raksha Prashikshan buatsaih a ni hi a lawmawm," a ti a; zirlaite chu an diknaah huaisen taka ṭang ngam turin a fuih a ni.