Congress leh MNF party ṭhalaite'n Minister Sapdanga thlalak an hâl

Congress leh MNF party ṭhalaite chuan minister K Sapdanga chu AMC Ward-VI by-election neih turah Edenthar Venga BSUP complex-a chengte vauah an puh a, ngaihdam dil tura an phût bakah, nimin khan MNF Hnam Rûn kawtah a thlalak an hâl.

MPYCC leh MNYF thuchhuah chuan, K Sapdanga hian Edenthar ZPM WhatsApp group-ah, "In vote thlakna kan hre vek dawn, karleh lawkah tute nge luah zui zel tlak kan lo thlir nawn ang tih vel mai mai a tawk viau. Opposition party enkawl nge in duh ruling Party enkawl?' te zu ti mai mai ila," tiin thu a thawn niin an tarlang a; "Hei hi BSUP, Edenthar Venga chengte laka chungtlâkna leh inpalzutna a ni a. Home Minister Pu K Sapdanga hian Model Code of Conduct a kalh mai pawh a ni lo, mi dang rîkrâpna leh vauna (intimidation) a tel avangin Representation of Peoples Act, 1951 dan kalh a ni," an ti.

Minister K Sapdanga thil tih dan chu pawi an tih thu sawiin MNYF leh MPYCC chuan, "Kalphung thar hlauhawmzia leh kalphung hlui ai pawha ṭha lo sorkar Mizoramin kan hrawn mek hi a vanduaithlak kan ti tak zet a ni," an ti a; AMC by-election hmain Aizawl North-III leh Edenthar BSUP bakah, Zoram mipui hnena ngaihdam dil turin an phût a ni.

MPYCC leh MNYF chuan, social media-a John Zosangliana Ralte (L) dâwta puhtu Gilbert Ralte lakah nimin khan Cyber Crime PS-ah FIR leh criminal comp­laint an thehluh thu an tarlang bawk.