World Photography Day hmang; Photo Exhibition cum Sale buatsaih

IPR department, Mizoram Photographers' Society (MPS) leh Photography Club of Mizoram (PCOM)-te chuan nimin khan Vanapa Hall-ah World Photography Day vawi 185-na an hmang a, Art & Culture minister C Lalsawivunga'n hmanpuiin, Day puala Photo Exhibition cum Sale buatsaih a hawng.

World Photography Day pual hian thlalak inelna buatsaih a ni a, mi 97-in thlalak 468 an thehlut. Thlalak lut zinga a ṭha zual 100 thlante chu Photo Exhibition cum Sale-ah pho chhuah a ni a; thlalakte chu hlâwm thumah ṭhen niin, hlâwm tinah pakhatna aṭanga pathumna thlengin lawmman siam a ni. Exhibition cum Sale hi August 21, Nilaini thleng neih a ni ang.

Art & Culture Minister chuan, mi tinin smart phone an hûm fur tawh a, thlalak an uar em em hlawm tih sawiin, "Mahni leh mi dang tana mualpho theihna tur pawh ṭhen hrang thiam tawh loin thla kan lain kan thehdarh nasa mah mah niin a hriat," a ti a; MPS leh PCOM member-te chu a ṭha zawnga hnam ziaráng leh incheina, ram mawina leh khawtlang nunte pho chhuahnaa sûlsutu leh kawng kawhhmutu ni turin a chah.

World Photography Day lawmna inkhawm hi MPS president Zoramchhana'n a kaihruai a; IPR deparment-a photography nodal officer Pratap Chhetri pawhin thu sawiin, thlalatute chu an thiamna leh theihnate Mizoram tan hmang ṭangkai a, Mizoram mawina pho langtu nih tum turin a sáwm.

Chawhnuah photography workshop buatsaih a ni a, Malsawmtluanga Vangchhia leh Laldintluangi Tochhawng ten thil pawimawh an zirtir a ni.