Land Revenue & Settlement (LRS) minister B Lalchhanzova chuan, LRS department-ah post ruak 46.95% a awm mek a, surveyor bikah post ruak 55.47% a awm thu leh, ram chungchang chinfel loh tlingkhawm (pending case) 13,908 a awm thu a tarlang.
LRS Minister-in July 29, 2024-a a pisaa press conference a neiha a tarlan danin, LRS department-ah hian sanctioned post 950 a awm a, post 504 chu hnawhkhah a nih laiin, post 446 a ruak mek a, post ruak hi post awm zawng zawng aṭangin 46.95% a ni.
Revenue department-a group hrang hrang zingah group B-ah post ruak percentage sang berin, 51.92% a ni a, group B post awm 260 zinga 125 chiah hnawhkhah niin, post hnawhkhah loh 135 a awm.
Surveyor bik post 137 a awm a, chu'ng zinga a zatve aia tam post 76 (55.47%) chu a ruak mek. Surveyor 15 lak belh an tum mek a, MPSC-in buaipuiin, July 9, 2024 khan advertisement an chhuah tawh a ni.
LRS department chuan March 28, 2024 khan order tichhuakin, ram chungchang chinfel loh tlingkhawm (pending case) awm zat a khawn khawm a, pending case an dawn khawm tawh zawng zawng chu 13,908 a ni. Aizawl district-ah tam berin, 4,395 a tling.
B Lalchhanzova chuan, pending case an dawn tawh zinga kum 2021 chin hma lama mite chu June 2024 chhunga tihfel (clear) vek tura an intih thu a sawi a, "Chumi hnu lama pending case dawnte chu clear dan thla hnih dana report ṭhin tura inhriattir a ni," a ti.
Land Revenue & Settlement Minister sawi danin, Mizoram Land Revenue Act, 2013 Section 6(1) tlawhchhanin Revenue officer hrang hrangte leh SDO (Civil)-te chu Revenue court-ah May 1, 2024 khan notification hmanga puan a ni a; hei vang hian sub-division-a revenue court-te chuan an huam chhunga ram kaihhnawih thubuaite an ngaihtuah thei tawh dawn a ni.
LRS department chuan an department bika district zingah Aizawl leh Lunglei chu tihlen an tum a; Aizawl North, Aizawl South leh Lunglei district-ahte senior settlement officer (SSO) post siam a, SSO hnuaiah SO pakhat, ASO pakhat leh ASO (T) pahnih ṭheuh dah tum a ni.
LRS department hi January 21, 1972-ah din a ni a, March 29, 1994-ah department puitlingah dah a ni. LRS-ah hian directorate pahnih a awm mek a, chu'ngte chu Directorate of LRS leh Directorate of Registration and Stamps a ni a; Directorate of Registration and Stamps hi September 27, 2013-ah din a ni.
