State Handloom Exhibition buatsaih

Commerce & Indus­tries minister F Roding­liana chuan nimin khan Millennium Centre chung zawla Exhibition Hall-ah Hathkargha Mela (State Handloom Exhibition) a hawng a; Mizo kut­chhuak­te chawisan leh ngaih­hlut nachang hriat a ṭul thu a sawi.

F Rodingliana chuan, puantah (handloom) kal­tlangin Mizoram hmun hrang hrangah mi eng emaw zatin eizawnna an neih thu sawiin, "Puan­­­tah hi kan hnam zia­ráng phochhuah leh hum­him­naa hmanraw ṭangkai a ni a, puantahin hma a sawn zel theih nan kan kutchhuakte chawi­san leh ngaih­hlut nachang hriat hi mi tin mawh­phurhna a ni," a ti a; nasa zawka hnam ziaráng phochhuah a nih theih nan CI department-in puan­tah lama tuite an kaih­hruai a pawimawh thu a sawi.

Sorkarin kut hna­thawk, hlawhtlin tuma beitute thâ tichak tura ṭanpuina pek a ngaih pawimawh thu sawiin Minister chuan, puantah lama tui, hand holding policy hnuaia ṭanpui tlâkte dap chhuah leh ṭanpui dan tur ruahman turin CI department-a thawkte a chah.

CI director Maria CT Zuali pawhin thu sawiin, hnam ziarâng pholang thei thuam hrang hrang siam leh chawi lâr kawngah Mizo hmeichhiate fakawm a tih thu a sawi a; puantah chu eizawnna tlâk a nih angin ṭan la zel turin puan­tah­tute leh puantah lama tuite a fuih.

State Handloom Exhibition hi 10th National Handloom Day lawm­na puala Ministry of Textiles leh Commerce & Industries department-in an buatsaih a ni a; stall 60 siam niin, August 14, 2024 thleng a awh ang.