World Breastfeeding Week hawng

National Health Mission (NHM) hnuaia Reproductive & Child Health (RCH) chuan nimin khan Civil Hospital, Aizawl-a Paediatric Ward-ah World Breastfeeding Week hawnna hun an hmang a; Civil Hospital leh NHM-a thawkte an tel. Kumina Week thupui chu 'Closing the gap: Breastfeeding support for all' tih a ni.

Hawnna inkhawm kaihruaitu NHM mission director Dr Eric Zomawia chuan, India rama sorkar damdawi-in ṭha zingah Civil Hospital, Aizawl a tel thu a sawi a, "Civil Hospital Paediatric department bik phei chu naupang enkawlna ṭha bik (Muskan certified) zingah thlan tel a ni," tiin, Paediatric department-a thawk doctor leh nurse-te fakawm a tih thu a sawi. Nautê a pian aṭanga darkar khat ral hma ngeiin nu hnute hnêktir a ṭhat thu leh thla 6 an tlin thlenga nu hnute tui chauha châwm a pawimawh thu a sawi bawk.

Health Services joint director Dr Lily Chhakchhuak, RCH state programme officer ni bawk chuan, Breastfeeding Week chu August 1-7 chhunga hman tur a nih thu leh district tinah hman tur a nih thu a sawi a; nu hnute tui ṭhatna sawiin, "Nu hnute ngei nautein a hnêk hian an ṭhan len zelnaah an hrisel bik a, natna tam tak lakah a vêng thei a, an rilru thlengin a tichak thei a ni," a ti.

Inkhawmah hian Civil Hospital Paediatric department-a HoD Dr Lalrochhuanga'n nu hnute pek dan tur dik leh a ṭhat biknate a sawifiah a ni.