Aug. 22, 2024-ah Ward-VI by-election

State Election Commission chuan nimin khan Aizawl Municipal Corporation (AMC) Ward-VI (general seat) by-election neih hun a puang a, August 22, 2024-ah inthlan a ni dawn.

SEC ruahman dan chuan, AMC Ward-VI by-election-ah hian chuh tumte tan August 8, 2024 chawhnu dar 3 thleng hming pek luh theih a ni a, nomination paper-te chu August 9-ah endik a ni ang a, August 12 chhun dar 1 thleng inhnuh­dawh theih hun hawn a ni ang.

August 22 zing dar 7 aṭanga tlai dar 4 thleng vote thlâk hun hawn a ni ang a, vote thlakna atan electronic voting machine hman a ni dawn a, vote tlate chu August 26, 2024-ah chhiar tur a ni.

Ward-VI hian Chanmari West, Hunthar Veng leh Edenthar Veng a huam a, polling station 10 a awm. Bialtu corporator John Zosangliana chu March 21, 2024 khan a thih avangin by-election neih a ngai ta a ni.

AMC Ward-VI by-election neih turah hian ZPM party chuan an candidate atan H Lalremtluanga s/o H Biakchhunga, Chanmari West an thlang tih July 23, 2024 khan an lo puang tawh a; party dangte'n candidate an la puang lo.

State Election Commissioner chuan, inthlanna him, felfai leh muanawm a awm theih nan inthlanna buaipuitu, political party, media, tlawmngai pawl leh mipui ṭawiawmna a ngen a; vote thlak ṭheuh turin AMC Ward-VI chhunga voter-te a sawm a ni.