Chawlh lâk chungchangah DPAR-in memorandum chhuah

Department of Personnel & Administrative (DPAR) chuan sorkar hnathawk chawlh lak chungchang­ah hriattirna (office memo­randum) a chhuah a; chhan ṭha tak vang ni lo chuan chawlh lâk ngawt theih a ni lo tih a tarlang.

Thu dawn danin, Mizoram sorkarin aikal lâk a khap hnuah aikal late chuan an hna an zawm hlawm a, an zawm aṭanga rei lo têah chawlh an la nghal hlawm. Hei vang hian DPAR chuan July 30, 2024 khan chawlh lak chungchangah hian thu­chhuah a siam a ni.

DPAR tarlan danin, CCS (Leave) Rules, 1972 ang chuan sorkar hnathawk tana chawlh lak hi an dikna chanvo a ni ngawt lo a, chhan ṭha tak neiin chawlh lak tur a ni. Chawlh pe theitute chu chawlh an pek dawnin CCS (Leave) Rules, 1972-in chawlh lakna a remtihna angah chauh chawlh pe tura tih an ni.

Thuneitute chu instruction fel taka pe tura tih an ni a, sorkar hnathawkte chu dan loa chawlh lak tihtawp a nih theihna tura thurualpui turin DPAR chuan an sawm.