Bawngkawn-Durtlang kawng kama dan loa in sa lakah FIR thehluh a ni

Bawngkawn leh Durtlang inkara Protected Area chhunga phalna nei loa in satu pakhat, K Zasanga lakah Aizawl Municipal Corporation (AMC) chuan nimin khan Bawngkawn Police Station-ah first information report (FIR) an thehlut nia thu dawn a ni.

Thu dawn danin, AMC hotute chuan July 25, 2024 khan Bawngkawn-Durtlang Leitan inkar kawng­te a hmunah tlawh­in, Protected Area-in a huam chin an teh ṭha a; July 26 khan Municipal Com­­mi­ssioner hoin AMC enforcement staff-te'n dan loa in sate an enfiah bawk.

Gauhati High Court PIL (suo moto) no. 2/2024 thuchhuak zâwm loa in sa mek K Zasanga, Ramhlun North chu AMC thuneitute chuan a in sak titawp nghal tura hriattirna 'Stop Development Order' an pe nghal a; mahse, K Zasanga hian a in sak chu titawp loin a chhunzawm leh tih hriat a nih avangin nimin (August 1) khan AMC chuan Bawngkawn PS-ah FIR an thehlut ta a ni.

AMC hmalaknain AMC hotu te, Aizawl DC leh Aizawl SP aiawhte'n July 30, 2024 khan Bawngkawn-Durtlang Leitan inkarah Gauhati High Court thupek zawm a nih leh nih loh an enfiah leh a; kawngpui kama in sak phalna neia in sa mek, chhâwng khat pawh la sa zo lo te, in sa mekte'n in sak an chawlhsan ngei em tih te, dan phal loha hma thar la an awm leh awm loh te, petrol pump tura laihah hmalakna thar a awm leh awm lohte an endik.

July 30-a enfiahnaah hian phalna nei loa Protected Area chhunga in sa mek leh sa zo tawhte enfiah nghal a ni a; Bawngkawn leh Durtlang inkara Pro­tec­ted Area huam chhungah dan bawh­chhiaa in sa mek leh sa zo tawh mi 12 an awm mek tih hriat a ni.

Dan bawhchhiaa in sa zinga mi panga chu an in ṭhiat tura tihna, Demolition Order pek an ni tawh a, an zinga pakhat chuan May 8, 2024 khan a ṭhiat tawh a, mi dang pali chunga hmalak dan tur AMC chuan an buaipui mek.

In sa thar zinga mi pasarih dangte chu an in sak mek leh sak zawh tawhte ṭhiahsak turin AMC chuan hma a la mek a; dan anga insawifiah tura hriattirna (show cause notice) pek an ni tawh.

Lalhruaisanga, Chawn­tlangpui, Lawngtlai district-in Bawngkawn-Durtlang kawng, Haflong-a in sakna tur lei a laihin mipui tan harsatna nasa zawk a thlen tawh loh nan AMC chuan hma a la zui zel nia thu dawn a ni bawk.