KHAWTHLIR

MNF inhmukhawm

MNF Gen.Hqrs elected office bearer-te leh Aizawla MNF local council member-te chu July 31, Nilaini khan Mizo Hnam Rûnah an ṭhukhawm a, senior vice president Dr R Lalthangliana leh treasurer Lalruatkima ten thu an sawi. Ṭhutkhawmah hian kum 2025-a local council inthlan atana inbuatsaih dan turte leh MNF insawh­nghehna turte an sawiho a ni.

Nu leh naupang thi an awm lo

Hnahthial district bawrhsap Rita Lalnunmawii Pachuau kaihhruaiin nimin khan Maternal & Child Death review meeting neih a ni a; Hnahthial district-ah kum 2023-24 chhungin nu nau chunga thi leh naupang kum nga hnuai lam thi an awm lo tih tarlan a ni. Bawrhsap chuan, damloh nikhuaah, a bikin nau chhar turin doctor pangngai ngei pan ṭhin turin mipui a chah.

IPRO leh MJA

Hnahthiala information and public relations officer (IPRO) F Lalrinfela chuan nimin khan a pisaah Hnahthial district Mizoram Journalists' Association (MJA) member-te a kâwm. MJA leh IPR department chu ṭhen hran theih loh an nih avangin theihtawp chhuah tlâng a, a ṭha zawnga Hnahthial district pho chhuah kawnga thawhhopuiah MJA-te a sawm a ni.

Alumni Day lawm

Zirtiri Residential Science College Alumni Association chuan nimin khan Durtlang Leitana an college campus-ah Alumni Day vawi 8-na an lawm a, principal hlui JH Zoremthanga, MBSE chairman-in a hmanpui. Alumni Day pual hian Zirtiri RSC NSS leh Red Ribbon Club-in blood donation camp an buatsaih a, Alumni member leh zirlai mipa 103 leh hmeichhia 26-te'n Civil Hospital, Aizawl tan thisen unit 129 an pe a ni.

MRB ṭha tawh

Mizoram Rural Bank chuan online banking leh payment-a harsatna an tawh chu chinfel a ni tawh. Thu dawn danin, MRB-a account neite tan Unified Payments Interface (UPI) chi hrang hrang Gpay, PayTM, PhonePe, BHIM, etc. te chu hman theih a ni leh tawh a ni.

Mamit DC leh MJA

Mamit DC Jacob Lalawmpuia chuan niomin khan a pisaah Mamit IPRO leh MJA member-te thingpui a inpui. Bawrhsap chuan, MJA-te nena thawhhona ṭha an neih a duh thu sawiin, sâwt zawka thawhho dan ngaihtuah ṭul a tih thu a sawi a; ram leh district hmasawnna tura hmalaknate uluk taka vilpui turin chanchinbumite a sáwm. Mamit MJA-ah hian member pariat an awm mek a ni.

Lei tlahniam

Hnahthial khaw dáia National Highway-54/02, Sericulture Farm bula mi chu tun hnaia ruahsur nasa avangin lirthei kal theih lohin a tlahniam a, hei vang hian Hnahthial SP Shivendu Bhushan chuan Hnahthial paltlang tur lirtheite chu Hnahthial by-pass road-ah kal turin a hriattir.