Nu leh pate'n headmaster an dang

Thingthelh Primary School zirlai nu leh pate chuan Thingthelh P/S headmaster tura sorkarin a dah chu an duh lo a, headmaster-in a hna a zawm tur nimin khan an dang.

Thingthelh aṭanga thu dawn danin, Thingthelh P/S headmaster atan hian Tualbung P/S-a thawk lai L Biakchungnunga chu July 23, 2024 khan sawn a ni. Headmaster hian nimin khan a hna zawm turin Thingthelh P/S a pan a, mahse, zirlai nu leh pate chuan duh loin, thuziak hrang hrang keng chungin an lo dang a ni.

Zirlai nu leh pate chuan, headmaster chu hmaichhanah hmuin, eng hunah mah sikul zawm lo tur leh, a zawm a nih chuan an fate sikul kaltir an tum loh thu an lo hrilh.

L Biakchungnunga hi Bukpui khua niin, Thingthelh P/S-ah hian kum 15 a lo thawk tawh a; chhan hrang hrang avang leh hna a thawk ṭha tawk loa an hriat avangin Thingthelh VC-te chuan June 27, 2022 khan Kolasib-a District Education Officer hnenah complaint an thehlut a, July 27, 2022 khan Tualbungah sawn a ni.

Thingthelh P/S-ah hian zirlai 40 an awm a, zirtirtu nghet pahnih leh muster roll teacher pakhat an awm a ni.